नेपाली कांग्रेसका सभापति एवं प्रधानमन्त्री शेरबहादुर देउवाले पाँच दलीय गठबन्धन संसदको पूरै कार्यकालसम्म चल्ने बताएका छन् । उनले यो गठबन्धन कसैका विरुद्ध नभएको दाबी गरे । 

माओवादी केन्द्रको ८ औं महाधिवेशनलाई आइतवार काठमाडौंमा सम्बोधन गर्दै देउवाले चुनावपछि पनि गठबन्धन अगाडि बढोस् भन्ने आफ्नो चाहना रहेको बताएका हुन् । 

‘कसैको विरुद्ध होइन गठबन्धन, अहिलेको संविधानबाट संसद् पूरा कार्यकाल चलोस् । मन परेन भने कसैले भंग नहोस् । बीचमा संसद भंग नहोस् भन्ने पुनित उद्देश्य राखेर संविधानमा राखेको हो,’ देउवाले भने, ‘पाँच दलीय गठबन्धन संविधान र संसद बचाउने गठबन्धन हो । पूरा समयसम्म चल्ने छ, यसमा कसैले शंका गर्नु पर्दैन । अगाडि पनि होस् भन्ने चाहन्छु ।’ 

देउवाले अमरिकी आर्थिक सहयोग कार्यक्रम एमसीसी राष्ट्रहित विपरीत नरहेको दाबी गरे ।