सर्वोच्च अदालतका मुख्य रजिस्ट्रार लालबहादुर कुँवरलाई उच्च अदालत पाटनको न्यायाधीशमा सिफारिश गर्ने न्याय परिषद्को निर्णय एक साता बित्दा पनि कार्यान्वयन हुन सकेको छैन ।

गत फागुन २६ गते बसेको न्यायपरिषद् बैठकले मुख्य रजिस्ट्रार कुँवरलाई न्यायाधीशमा नियुक्तिका लागि सिफारिश गर्ने निर्णय गरेको थियो ।

कामु प्रधानन्यायाधीश दीपककुमार कार्कीले आफ्नै नेतृत्वमा बसेको बैठकको निर्णय कार्यान्वयन गर्न सकेका छैनन् । सिफारिश अनुसार कार्कीले कुँवरलाई न्यायाधीशमा नियुक्त गरिसक्नुपर्ने थियो ।

सोही बैठकबाट उच्च अदालत विराटनगरका मुख्य न्यायाधीश तिलप्रसाद श्रेष्ठलाई सर्वोच्च अदालतको न्यायाधीशमा सिफारिश गर्ने निर्णय पनि भएको थियो । उक्त निर्णय भने कार्यान्वयन प्रक्रियामा गइसकेको छ ।

संसदीय सुनुवाइबाट अनुमोदन हुनुपर्ने भएकाले संसदीय सुनुवाइ विशेष समितिले श्रेष्ठको सम्बन्धमा उजुरी आह्वान समेत गरिसकेको छ ।

तर कुँवरलाई न्यायाधीश बनाउने निर्णय कार्यान्वयन गर्न नसक्दा कामु प्रधानन्यायाधीश कार्कीलाई 'पहिलो गाँसमै ढुंगा' भनेसरह भएको छ ।

यसअघि सर्वोच्च अदालतका तत्कालीन मुख्य रजिस्ट्रारहरू नहकुल सुवेदी, नृपध्वज निरौलालाई उच्च अदालतको मुख्य न्यायाधीश र राजनप्रसाद भट्टराईलाई न्यायाधीशमा सिफारिश गर्ने निर्णय दुईदेखि तीन दिनभित्र कार्यान्वयनमा आइसकेको थियो ।

तर कुँवरको हकमा भने एक साता बितिसक्दा पनि निर्णय कार्यान्वयनमा आउन सकेको छैन ।

सर्वोच्च अदालतका प्रवक्ता विमल पौडेलले यस विषयमा कुनै पनि प्रतिक्रिया दिन चाहेनन् ।

'सर्वोच्च अदालतको मुद्दाको विषयमा मात्र म बोल्न सक्छु, उहाँ (मुख्य रजिस्ट्रार), न्यायपरिषदको निर्णय तथा त्यसको कार्यान्वयनका विषयमा केही पनि बोल्न सक्दिनँ,' प्रवक्ता पौडेलले भने, 'त्यस विषयमा सर्वोच्च अदालतको प्रशासन हेर्ने रजिस्ट्रारले बोल्न सक्नुहुन्छ कि !'

न्यायाधीशमा सिफारिश भएका कुँवरले आज (चैत्र २ गते) सम्म पनि मुख्य रजिस्ट्रारकै रूपमा काम गरेका छन् ।

उनी प्रत्येक दिन सर्वोच्च अदालत आएर मुख्य रजिस्ट्रारको हैसियतले मुद्दाको पेशी व्यवस्थापनदेखि प्रशासनिक काम समेत गर्दै आएका छन् ।

सर्वोच्च अदालतको प्रशासन शाखा समेत हेर्ने सूचना अधिकारी देवेन्द्र ढकाल उक्त निर्णय कार्यान्वयनको प्रक्रियामै रहेको बताउँछन्।

'उहाँ (मुख्य रजिस्ट्रार)लाई उच्च अदालत पाटनको न्यायाधीशमा नियुक्ति दिने प्रशासनिक प्रक्रिया अघि बढिसकेको छ,' ढकालले लोकान्तरसँग भने, 'त्यस विषयमा आजभोलिमा नै निर्णय हुनसक्छ ।'

विगतमा मुख्य रजिस्ट्रारलाई उच्च अदालतको मुख्य न्यायाधीशमा सिफारिश गर्ने गरिए पनि आफूलाई न्यायाधीशमा मात्र सिफारिश गर्नु एक तह घटुवासरह भएको बुझाइमा कुँवर रहेको उनीनिकट कर्मचारीहरू बताउँछन् ।

'न्यायाधीश पद मात्र स्वीकार नगर्ने, बरु मुख्य रजिस्ट्रारकै रूपमा बस्ने उहाँको अडान छ,' कुँवरसँग नियमित संवादमा रहेका एक कर्मचारीले लोकान्तरसँग भने, 'न्याय परिषदले उक्त निर्णय सच्याएर जुनसुकै उच्च अदालतको मुख्य न्यायाधीशमा सिफारिश गरे पनि जान उहाँ तयार हुनुहुन्छ ।'

कुँवरको अडानले कामु प्रधानन्यायाधीश कार्की दबाबमा छन् । कुँवरले नियुक्ति नलिँदा वा निर्णय सच्याउनुपर्दा कार्कीका लागि पहिलो निर्णयमा नै असफलता हात लाग्ने खतरा छ ।