क्यान्सर रोगीलाई निःशुल्क औषधि

ललितपुर भैँसेपाटीकी अचला पोखरेलले पाटन अस्पतालद्वारा उपलब्ध गराउँदै आएको क्यान्सरको औषधि नियमित सेवन गरिरहेकी छन्। जीवनभर सेवन गर्नुपर्ने मासिक छ लाख रुपैयाँबराबरको औषधि उनले निःशुल्क प्राप्त गरिरहेकी छन् ।

उनलाई डेढ वर्षअघि फोक्सोको क्यान्सर भएको थियो । शुरूमा खोकीको लक्षण देखिएपछि नजिकैको अस्पतालमा उपचार गराउँदा क्यान्सर पत्ता लागेको थियो । दुई महिनासम्म छ साइकल केमोथेरापी चढाएपछि उनले नियमित औषधि सेवन गर्दै आएकी छन‍् ।

शल्यक्रिया गर्न नमिल्ने भएपछि छ साइकल केमोथेरापी चढाएर उनले औषधि सेवन गर्न थालेकी हुन् । “शुरूमा मासिक दुई लाख ८० हजार रुपैयाँबराबरको औषधि सेवन गरेकी थिएँ,” उनले भनिन्, “औषधि अत्यधिक महँगो भएकाले क्यान्सर रोगका बिरामीको पहुँच बाहिर रहेछ ।” साथीहरूले पाटन अस्पतालमा निःशुल्क औषधि पाइन्छ भन्दा अचलाले शुरूमा पत्याइनन्।

क्यान्सरको औषधि निःशुल्क पाउने भएपछि उनले बडो राहतको अनुभव गरिन्। पाटन अस्पतालका क्यान्सर रोग विभाग प्रमुख डा. अरुण शाहीले पाटन अस्पतालमा मासिक १० लाख रुपैयाँसम्मको औषधि सेवन गर्ने बिरामी पनि रहेको बताए । अत्यन्त महँगो रोगका रूपमा क्यान्सरलाई लिइन्छ । नेपालबाहेक भारत, सिङ्गापुर, थाइल्यान्डलगायतका देशमा गएर उपचार गराउनुपरेमा एक करोड रुपैयाँभन्दा बढी खर्च लाग्छ ।

पाटन अस्पताल र भरतपुरस्थित बीपी कोइराला मेमोरियल क्यान्सर अस्पतालले क्यान्सरका रोगीलाई निःशुल्क औषधि उपलब्ध गराउँदै आएको छ । पेटको क्यान्सर, रक्त क्यान्सर, मिर्गौला क्यान्सर र फोक्सोको क्यान्सर लागेका बिरामीले निःशुल्क रूपमा औषधि सेवन गरिरहेका छन् ।

पाटन अस्पतालका क्यान्सर विशेषज्ञ डा. शाहीले नेपालमा दुई हजार क्यान्सर बिरामीले निःशुल्क औषधि सेवन गरिरहेको बताउँदै उनीहरूले मासिक १५ हजारदेखि १० लाख रुपैयाँसम्मका औषधि सेवन गरिरहेको जानकारी दिए । उनले क्यान्सरका रोगीले लाखौँ रुपैयाँबराबरका औषधि निःशुल्क पाउँछन् भन्ने सूचना सबै क्यान्सरका बिरामीले थाहा नपाएको बताउँदै शल्यक्रियापछि नियमित औषधि सेवन गर्नैपर्ने बताए । गोरखापत्र दैनिकमा सरोज ढुङ्गेलले खबर लेखेका छन् ।