सरकारले राजदूतमा सिफारिस गरेका २० जनाको संसदीय सुनुवाइ प्रक्रिया शुरू भएको छ । सरकारले सिफारिस गरेका राजदूतबारे उजुरी माग्ने निर्णय संघीय संसदको संसदीय सुनुवाइ समितिले गरेको छ ।

सुनुवाइ समितिले शनिवार सूचना प्रकाशित गरी राजदूतमा सिफारिस भएका व्यक्ति उक्त पदका लागि उपयुक्त छैन भन्ने लागेमा स्पष्ट आधार र प्रमाणसहित १२ वैशाखभित्र समितिमा उजुरी दिन भनेको छ ।

२४ चैतमा बसेको मन्त्रिपरिषद् बैठकले विभिन्न २० देशमा राजदूत सिफारिस गरेको थियो । सरकारले चीनका लागि विष्णुपुकार श्रेष्ठ, श्रीलंकामा वासुदेव मिश्र, दक्षिण अफ्रिकामा दानबहादुर तामाङ, स्पेनमा शर्मिला पराजुली ढकाल, रुसी महासंघमा मिलनराज तुलाधर, मलेसियामा डिल्लीराज पौडेल, इजरायलमा कान्ता रिजाल र साउदी अरेबियामा नवराज सुवेदीलाई राजदूत सिफारिस गरेको थियो ।

त्यस्तै, अष्ट्रेलियामा कैलाशराज पोखरेल, कतारमा डा. नरेन्द्रविक्रम ढकाल, दक्षिण कोरियामा ज्योति प्याकुरेल भण्डारी, डेनमार्कमा प्रा. डा. रामस्वार्थ राय, जापानमा दुर्गाबहादुर सुवेदी, ब्राजिलमा निर्मलराज काफ्ले, इजिप्टमा सुशीलकुमार लम्साल राजदूत सिफारिस भएका छन् ।

त्यसैगरी, संयुक्त राष्ट्रसंघको कार्यालय भियानामा भरतकुमार रेग्मी बहराइनमा तीर्थराज वाग्ले, बंगलादेशमा घनश्याम भण्डारी, म्यानमारमा हरिशचन्द्र घिमिरे र ओमानमा डोरनाथ अर्यालको नाम सरकारले सिफारिस गरेको थियो ।

उनीहरूका बारे सूचना दिने व्यक्तिले आफ्नो पहिचान गोप्य राख्न पाउने समितिले जनाएको छ ।