अमृता खत्रीको शंकास्पद मृत्यु प्रकरणः ४ दिनपछि पोस्टमार्टम, प्रहरी अनुसन्धानमा माइती पक्षको आशंका

रुपन्देही तिलोत्तमाकी अमृता खत्री टण्डनको शंकास्पद मृत्यु भएको चार दिनपछि आइतवार पोष्टमार्टम भएको छ ।

जिल्ला प्रशासन कार्यालय, रूपन्देहीले निष्पक्ष घटनाको अनुसन्धान गरी छानबिन गर्ने प्रतिबद्धता जनाएपछि पीडित माइती पक्ष शवको पोष्टमार्टम गर्न सहमति जनाएका हुन् । 

‘फोरेन्सिक ल्याब एक्सपर्ट’को रोहवरमा पीडित पक्षले चाहेको अस्पतालमा पोष्टमार्टम गराउन प्रशासनले सहयोग गर्ने भएपछि सहमत भएको मृतकका दाजु पुष्पक खत्रीले जानकारी दिए । मृतक २९ वर्षीया अमृताको पोष्टमार्टम भए पनि शव बुझेर दाहसंस्कार भने भएको छैन । तर, पीडित माइती पक्षले प्रहरीको अनुसन्धानमा आशंका गरेको छ । पुष्पक खत्रीले सीआईबीबाट अनुसन्धान गराउन माग गरे । 

रुपन्देहीका प्रमुख जिल्ला अधिकारी ऋषिराम तिवारी, रूपन्देही प्रहरी प्रमुख रबिन्द्र रेग्मी, प्रवक्ता डीएसपी नवरत्न पौडेलको उपस्थितिमा छलफल भएको थियो । 

गएको बुधवार (चैत ३० गते) तिलोत्तमा नगरपालिका–२, जानकीनगरकी २९ वर्षीया अमृताको रहस्यमय मृत्यु भएको थियो । 

सोही दिन साँझ झण्डै ८ः३० बजे माइतबाट सकुशल घर पुगेकी अनिताको १० बजे लुम्बिनी प्रादेशिक अस्पतालमा मृत्यु भएको थियो । अमृताले विष सेवन गरेकाले मृत्यु भएको परिवारले बताएको छ । तर, माइती पक्षले उनको योजनाबद्ध रुपमा हत्या गरिएको दाबी गर्दै आएको छ । 

घटनाका सम्बन्धमा आइतवार माइती पक्षले आफ्नै घरमा पत्रकार सम्मेलन गरेर निष्पक्ष अनुसन्धानका लागि सम्बन्धित निकायलाई आग्रह गरेका छन् । 

अमृताका दाजु पुष्पकले मुद्दा दर्ता नै नगरी दुई दिनसम्म बुटवलका प्रहरी नायव उपरीक्षक ठगबहादुर केसीले मुद्दा दर्ता भइसकेको भनेर आफूहरूलाई झुटो बोलेको दाबी गरे । घरपरिवारले योजना बनाएर हत्या गरेको अमृताका दाजुले आरोप लगाएका छन् ।