श्रीलंकामा आन्दोलनकारीहरुले राष्ट्रपतिको सरकारी भवनमाथि कब्जा जमाएका छन् । राजधानी कोलम्बोस्थित राष्ट्रपतिको सरकारी निवासमाथि आन्दोलनकारीहरुले कब्जा जमाएका हुन् । 

कडा सुरक्षा घेरालाई तोडेर आन्दोलनकारीहरू राष्ट्रपतिको सरकारी निवासभित्र घुसेपछि राष्ट्रपति गोटाबाया राजापाक्षे सरकारी निवास छाडेर सुरक्षित स्थानतर्फ गएको सिएनएनले उल्लेख गरेको छ । ‘श्रीलंकाको सरकारी टेलिभिजनले सार्वजनिक गरेको भिडियो फुटेजमा राष्ट्रपति गोटाबाया सरकारी निवासमा देखिएका छैनन’ सिएनएनले लेखेको छ । 

राजधानीको कोलम्बाको स्थिति तनावपूर्ण बनेको छ । हजारौ प्रदर्शनकारीहरू राष्ट्रपतिको सरकारी निवासमा प्रवेश गरेको सिएनएनले जनाएको छ । त्यहाँ सुरक्षाकर्मीको बाक्लो उपस्थिति छ । राष्ट्रपति निवासमा सेना र प्रहरी परिचालन गरिएको छ । 

प्रहरीले आन्दोलनकारीलाई तितरवितर पार्नका लागि अश्रु ग्यास प्रहार गर्नुका साथै हवाई फायर समेत गरेको सिएनएनले जनाएको छ । 

श्रीलंकामा आर्थिक संकट चुलिएपछि त्यहाँका जनता आन्दोलनमा उत्रिएका छन् । उनीहरुले लामो समयदेखि दैनिकजसो सडक प्रदर्शन गरिरहेका छन् । उनीहरुले विशेष गरेर मन्त्री तथा सरकारी अधिकारीहरुका निवासलाई लक्षित गर्दै घेराउ तथा प्रदर्शन गरिरहेका छन् । 

आन्दोलनकारीहरुले धेरैजसो मन्त्रीका घरमा पसेर आगजनी गरिसकेको सिएनएनले जनाएको छ। प्रदर्शन उग्र बन्दै गएपछि श्रीलंकाका अधिकांश ठाउँमा अनिश्चितकालीन कर्फ्यू आदेश जारी गरिएको छ ।