महालक्ष्मी विकास बैंक लिमिटेडले १० लाख कित्ता ऋणपत्र जारी गर्ने भएको छ । महालक्ष्मीले प्रतिऋणपत्र अंकित मूल्य रु. १ हजारका दरले कुल १ अर्ब रुपैयाँ (१० लाख कित्ता) मूल्य बराबरको दश वर्षे ऋणपत्र बिक्री गर्न लागेको हो । 

बैंकले ऋणपत्र निष्काशनको लागि एनआईसी एशिया क्यापिटल लिमिटेडलाई बिक्री प्रबन्धक नियुक्त गरेको छ । सोमवार महालक्ष्मीको केन्द्रीय कार्यालयमा आयोजित एक समारोहमा वार्षिक ११ प्रतिशत ब्याजदरको ऋणपत्र निष्कासन गर्नको लागि महालक्ष्मी र एनआईसी एशियाबीच निष्कासन तथा बिक्री प्रबन्धक नियुक्ति गर्ने सम्बन्धी दुई पक्षीय सम्झौतामा हस्ताक्षर भएको छ । 

विगत २८ वर्षदेखि अनवरत गुणस्तरीय वित्तीय सेवा प्रदान गर्दै आएको महालक्ष्मीले आवश्यक सम्पूर्ण प्रक्रिया पूरा गरेपछि ऋणपत्र बिक्री गर्ने जनाएको छ । 

उक्त ऋणपत्रमध्ये ६० करोड रकम बराबरको ऋणपत्र व्यक्तिगत तवरबाट र रु.४० करोड बराबरको ऋणपत्र रकम सर्वसाधरण नेपालीहरूमा सार्वजनिक निष्कासनबाट बिक्री गरिने छ । 

महालक्ष्मीले प्रदेश १ मा ५, मधेश प्रदेशमा १५, बागमतीमा ३७, गण्डकीमा ९, लुम्बिनीमा १८, कर्णालीमा २ र सुदूरपश्चिम प्रदेशमा १७ वटा गरी कुल १०३ वटा शाखामार्फत करिब ६ लाख ग्राहकलाई सेवा प्रदान गर्दै आइरहेको छ । 

महालक्ष्मी बैंकले ग्राहकहरूको वैदेशिक यात्राको क्रममा कारोबार थप सुरक्षित, सहज र भरपर्दो होस् भन्ने उद्देश्यले ट्राभल कार्ड, ई कमर्श कार्ड र डलर कार्डसमेत जारी गरिसकेको छ । महालक्ष्मी ट्राभल कार्ड, ई कमर्श कार्ड र डलर कार्ड जारी गर्ने एकमात्र विकास बैंक भएको बैंकको दाबी छ ।