सरकारले हालसम्म आरोहण नगरिएका हिमालहरूको आरोहण खुला गर्ने तयारी गरिएको छ । संस्कृति, पर्यटन तथा नागरिक उड्डयनमन्त्री जीवनराम श्रेष्ठले अहिलेसम्म प्रयोगमा नआएका नयाँ हिमालहरूको आरोहण खुला गर्ने बताएका हुन् । 

आइतवार नेपाल पर्वतारोहण संघको ३२औँ साधारणसभालाई सम्बोधन गर्दै उनले सरकारले ५ हजार ८ सय मिटरदेखि ८ हजार मिटरसम्मका नयाँ हिमालहरूमा आरोहणका लागि अनुमति दिने तयारी गरेको बताए । मन्त्री श्रेष्ठले कुन–कुन हिमालहरूमा आरोहण गर्न सकिन्छ र कुन–कुन हिमालहरूमा आरोहण खुला गर्दा पर्यटकको आगमन बढेर त्यो क्षेत्रको जनजीवनलाई समेत लाभान्वित बनाउन सकिन्छ भन्ने कुराको समीक्षा गरेर हिमाल आरोहणको अनुमति दिने बताए । 

‘सरकारले पर्यटन क्षेत्रको विकासको लागि नयाँ हिमालहरूमा आरोहण गर्ने अनुमति दिनुपर्छ भन्ने सोच राखेका छौँ । अहिले जे–जति हाम्रा हिमाल आरोहण गर्ने अनुमति दिने काम भइरहेको छ । त्यसको अतिरिक्त अहिले प्रयोगमा नआएका ५ हजार ८ सय मिटरदेखि ८ हजार मिटरसम्मका नयाँ हिमालहरूमा पनि आरोहणको लागि अनुमति प्रदान गर्ने भन्ने मन्त्रालयले योजना अगाडि सारेको छ’, उनले भने, ‘कुन–कुन हिमालहरूमा आरोहण गर्नसक्छौँ । कुन–कुन हिमालहरूमा आरोहण खुला गर्दा पर्यटन आगमन बढाउन सक्छौँ । त्यो क्षेत्रको जनजीवनलाई समेत लाभान्वित बनाउन सक्छौँ । त्यो कुरालाई समीक्षा गरेर अनुमति दिइनेछ ।’ 

उनले पर्वतारोहण सम्बन्धी अन्योलमा रहेका ऐन, कानून र नियमहरू सरकार तत्काल निराकरण गर्न तयार रहेको बताए । मन्त्री श्रेष्ठले सरकारले विगतमा एक वर्षको लागि भ्रमण वर्ष तोकेर काम गर्ने प्रचलन अन्त्य गरी अब एक वर्षको भ्रमण वर्ष भई २०२३ देखि २०३३ सम्म नेपाल भ्रमण दशक घोषणा गरेर पर्यटन क्षेत्रलाई व्यवस्थित बनाउने बताए । 

मन्त्री श्रेष्ठले नेपाल विश्वको पर्यटकको गन्तव्य स्थलको रूपमा विकास गर्न आवश्यक रहेको बताए । उनले नेपालका हिमाल, पहाड, प्राकृतिक खालका उचाइहरूमा पर्यटन खेलकुदको विकास गर्नु आवश्यक रहेको बताए । उनले एडभान्चर खुलकुद, पर्यटनवेस खेलकुद र माउण्टेन खेलकुदका रूपमा पर्वतहरूलाई आधार बनाएर खेलहरूको विकास गर्न सके नेपाल पर्यटक गन्तव्यको रूपमा विकास हुने बताए । ‘२०२३ देखि २०३३ सम्म नेपाल भ्रमण दशक घोषणा गरेर निरन्तर रुपमा पर्यटन विकास र पूर्वाचारका काम अगाडि बढाएर पर्यटन क्षेत्रलाई व्यवस्थित बनाउनुपर्छ’, उनले भने । 

मन्त्री श्रेष्ठले नेपालको नेचर, एड्भान्चर र कल्चरको विकास गरी व्यवस्थित गर्नसके पर्यटकहरूलाई आकर्षित गर्ने माध्यम बलियो बन्ने बताए । उनले सरकार र निजी क्षेत्रको सहकार्यबाट नै नेपालको पर्यटन क्षेत्रको विकास गर्न सकिन्छ भन्ने मान्यताका साथ अगाडि बढेको बताइन् । ‘सरकार निजी क्षेत्रको सहकार्यबाट नै नेपालको पर्यटन क्षेत्रको विकास गर्न सकिन्छ भन्ने मान्यता वर्तमान सरकारले लिएको छ । पर्वतारोहण क्षेत्रमा काम गर्ने पर्यटन व्यवसायीहरूको पर्यटक भित्र्याउन महत्वपूर्ण भूमिका पु¥याउने अपेक्षा लिएका छौंँ’, उनले भने । 

संघका अध्यक्ष निमानुरु शेर्पाले पर्यटनसँग सम्बन्धित सेवा सुविधा एकद्वार प्रणालीमार्फत लिने नीति लिनुपर्ने बताए । उनले साहसिक खेलहरू हिमचुली खुला गर्ने नीति आवश्यकता रहेको बताए । उनले नेपालका अन्तर्राष्ट्रिय विमानस्थलहरूमा छुटै पर्वतारोही कक्ष व्यवस्थापन गर्न माग गरे ।