झापाको बिर्तामोडस्थित पूर्वाञ्चल क्यान्सर अस्पताल र अनुप्रस्था फाउन्डेशनबीच विपन्न क्यान्सर रोगीको निःशुल्क उपचारका लागि सम्झौता भएको छ ।

अर्थाभावका कारण क्यान्सर रोगको उपचारबाट वञ्चित नागरिकको निःशुल्क उपचार गर्ने उद्देश्यले अस्पताल र फाउन्डेशनबीच सम्झौता भएको हो ।

मंगलवार अस्पताल परिसरमा आयोजित एक कार्यक्रममा दुवै पक्षले सम्झौता पत्रमा हस्ताक्षर गरेका छन् ।

अनुप्रस्था फाउन्डेसनका नीरन शाहीले अर्थाभावमा कोही पनि मर्नुपर्ने अवस्था नहोस् भन्ने उद्देश्यले अस्पतालसँग सम्झौता गरिएको बताए ।

‘विपन्न नागरिकले उपचारको पहुँच नहुँदा अकालमै मर्नुपर्ने अवस्था छ,’ उनले भने, ‘जो उपचारको पहुँचभन्दा टाढा छन्, उनीहरूको सेवा गर्नु हाम्रो मूल उद्देश्य हो ।’

अस्पतालका डा. निराजन प्रसाईंले फाउन्डेशनमार्फत सिफारिस भएर आउने बिरामीको ७० लाख रुपैयाँसम्म निःशुल्क उपचार गरिने जानकारी दिए । क्यान्सर रोगविरुद्ध लामो समयदेखि आफूहरूले काम गर्दै आएको र सामाजिक उत्तरदायित्वअन्तर्गत अनुप्रस्था फान्डेसनसँग निःशुल्क उपचारको सम्झौता गरिएको उनले बताए ।

आफ्नै ब्याण्ड रहेको अनुप्रस्थाले राष्ट्रिय–अन्तर्राष्ट्रिय मञ्चमा सांगीतिक प्रदर्शनीका क्रममा अस्पतालको प्रचारप्रसार गर्ने र अस्पतालले १ वर्षमा अनुप्रस्थामार्फत सिफारिस भएर आएका विपन्न क्यान्सर रोगीको निःशुल्क उचपार गर्ने सम्झौता पत्रमा उल्लेख भएको अस्पतालका सूचना अधिकारी प्रमिश गिरीले जानकारी दिए ।

अस्पतालले हालसम्म १ हजार ३०९ क्यान्सर रोगीको पहिचान गरी उपचार सहुलियतका लागि सिफारिस समेत गरेको उनले बताए ।