आगामी मंसिर ४ गते हुने प्रतिनिधि सभा निर्वाचनका लागि प्रत्यक्षतर्फ ५७ राजनीतिक दलले उम्मेदवारी दर्ता गराएका छन् । ती दलले १ हजार ४३३ पुरुष र १५० महिला उम्मेदवार उठाएका छन् । 

निर्वाचन आयोगले सार्वजनिक गरेको तथ्यांकअनुसार ८ सय ५८ पुरुष र ८५ महिला गरी ९ सय ४३ जनाले स्वतन्त्र उम्मेदवारी दर्ता गराएका छन् । प्रतिनिधिसभा सदस्यका लागि पहिलो हुने निर्वाचित हुने प्रणाली (प्रत्यक्ष) तर्फ २ हजार २ सय ९१ पुरुष र २ सय ३५ महिला गरी २ हजार ५२६ जनाको उम्मेदवारी परेको छ । 

प्रत्यक्षतर्फ प्रदेश १ मा ५ सय ४८ जनाले उम्मेदवारी दिएका छन् । ४ सय ९३ पुरुष र ५५ महिलाले उम्मेदवारी दिएको निर्वाचन आयोगले जनाएको छ । प्रदेश १ मा ३० दल र स्वतन्त्रले उम्मेदवारी दिएको जनाइएको छ । मधेश प्रदेशमा प्रत्यक्षतर्फ १ हजार ५५ जनाको उम्मेदवारी परेको छ । ९ सय ७८ पुरुष, ७६ महिला र अन्यमा १ जनाले उम्मेदवारी दिएका छन् । मधेश प्रदेशमा ३७ दल र स्वतन्त्रले उम्मेद्वारी दिएका छन् । 

बागमती प्रदेशमा ३२ दल र स्वतन्त्रले गरी प्रत्यक्षतर्फ ७ सय १ जनाको उम्मेदवारी परेको छ । जसमा पुरुष ६१९ र महिला ८२ छन् । गण्डकी प्रदेशमा २३ दल र स्वतन्त्र गरी प्रत्यक्षतर्फ २७१ जनाको उम्मेदवारी परेको छ । जसमा पुरुष २३७ र महिला ३४ जना छन् । 

लुम्बिनी प्रदेशमा प्रत्यक्षतर्फ २५ राजनीतिक दल र स्वतन्त्र गरी ५३२ जनाको उम्मेदवारी परेको छ । उम्मेदवारी दिनेमा ५०० पुरुष र ३२ महिला छन् । कर्णाली प्रदेशमा प्रत्यक्षतर्फ १६ राजनीतिक दल र स्वतन्त्र गरी १४३ जनाको उम्मेदवारी परेको छ । जसमा १३९ पुरुष र ४ जना महिलाको उम्मेदवारी रहेको आयोगले जनाएको छ ।

यसैगरी सुदूरपश्चिम प्रदेशमा प्रत्यक्षतर्फ २० राजनीतिक दल र स्वतन्त्र गरी २२६ जनाको उम्मेदवारी परेको छ । जसमा २१२ पुरुष र १४ जना महिलाको उम्मेदवारी परेको जनाइएको छ । यो तथ्यांक सोमवार साँझसम्म आयोगको प्रणालीमा प्रविष्ट भएका आधारमा सार्वजनिक गरिएको आयोगले जनाएको छ । रासस