आगामी मंसिर ४ गते हुने प्रतिनिधि सभा तथा प्रदेश सभा सदस्यको निर्वाचनका लागि मोरङमा ११ जनाले उम्मेदवारी फिर्ता लिएका छन् ।

मोरङमा २२७ जनाले उम्मेदवारी दर्ता गरेका थिए । प्रतिनिधि सभा सदस्यतर्फ ३ जना र प्रदेश सभा सदस्यतर्फ ८ जनाले उम्मेदवारी फिर्ता लिएको मुख्य निर्वाचन अधिकृतको कार्यालय मोरङले जनाएको छ । 

मुख्य निर्वाचन अधिकृतको कार्यालय मोरङका अनुसार लोकतान्त्रिक समाजवादी पार्टी (लोसपा)का राजु मण्डल राजवंशीले मोरङ क्षेत्र नं. ६ को प्रतिनिधि सभा सदस्यका लागि दिएको उम्मेदवारी फिर्ता लिएका छन् । काग्रेसका नेता डा. शेखर कोइरालालाई समर्थन गर्दै उनको उम्मेदवारी फिर्ता लिएका हुन् । 

यसैगरी सुजाता थापाले मोरङ क्षेत्र नं. १ को प्रतिनिधि सभा सदस्यमा दिएको उम्मेदवारी पनि फिर्ता लिएकी छन् । उनी स्वतन्त्र उम्मेदवार थिइन् । मोरङ क्षेत्र नं. ४ बाट गोकुलप्रसाद पोखरेलले दिएको स्वतन्त्र उम्मेदवारी पनि फिर्ता लिएका छन् । 

नेकपा एकीकृत समाजवादी पार्टीका दुई जना नेताले उम्मेदवारी फिर्ता लिएका छन् । एकीकृत समाजवादी पार्टीका पोलिटब्युरो सदस्य महेश रेग्मीले मोरङ क्षेत्र नं. ४(२) बाट प्रदेश सभामा उम्मेदवारी दिएका थिए । उनको उम्मेदवारीले सत्ता गठबन्धन तथा एमालेका उम्मेदवारलाई पनि असर पर्ने अनुमान गरिएको थियो । रेग्मी मोरङ क्षेत्र नम्बर ४ मा लोकप्रिय मानिन्छन् । यस क्षेत्रमा सत्ता गठबन्धनबाट कांग्रेसका केन्द्रीय सदस्य तथा विराटनगर महानगरपालिकाका निवर्तमान मेयर भीम पराजुली चुनावी मैदानमा छन् । 

एकीकृत समाजवादी मोरङका प्रवक्ता वसिम आलमले मोरङ क्षेत्र नं. ६(२) मा दिएको उम्मेदवारी उम्मेदवारी फिर्ता लिएका छन् । यस क्षेत्रमा पनि कांग्रेसका केदार कार्की उम्मेदवार छन् । 

यसैगरी मोरङ क्षेत्र नं.१(२) मा उम्मेदवारी दिएका डिल्लीराम शर्मा अधिकारी, मोरङ क्षेत्र नं. ३(२) का तिलकप्रसाद राई, कञ्चनकुमार बुढाथोकी, मोरङ क्षेत्र नं. ५(२) का भुराज राई, मोरङ क्षेत्र नं. ६(२) बाट जीवनकुमार गुप्ता र सुरेशकुमार श्रेष्ठले पनि उम्मेदवारी फिर्ता लिएका छन् । उनीहरू सबै जनाले स्वतन्त्र उम्मेदवारी दिएका थिए ।

प्रदेश निर्वाचन कार्यालय विराटनगरका अनुसार संघतर्फ ६ र प्रदेशतर्फ १२ वटा निर्वाचन क्षेत्र रहेको मोरङमा २१४ जनाले उम्मेदवारी दर्ता गराएका छन् । प्रतिनिधि सभातर्फ १०५ र प्रदेशमा १०९ जनाले उम्मेदवारी दिएका छन् ।

उम्मेदवारी दिएकामध्ये मोरङ क्षेत्र नं. १(१) का स्वतन्त्र उम्मेदवार प्रेम बर्देवा र मोरङ क्षेत्र नं. २(१) बाट जनमत पार्टीबाट उम्मेदवारी दिएका दीपेन्द्रकुमार चौधरीको उम्मेदवारी निर्वाचन अधिकृतको कार्यालयले खारेज गरेको छ । बर्देवा कालोसूचीमा परेको र चौधरीले स्थानीय तहको निर्वाचनमा उम्मेदवार बने पनि खर्च विवरण भने तोकिएको समयमा बुझाएका थिएनन् । 

मत परिणाम आएको ३० दिनभित्रमा आयोगमा खर्च विवरण बुझाउनु पर्ने कानूनी बाध्यता रहेको छ ।