पूर्व सभामुख एवं नेकपा माओवादी केन्द्रकी स्थायी समिति सदस्य ओनसरी घर्तीले डेंगुबाट निधन भएकी कलाकार सुशीला घ्लान तामाङका परिवारलाई भेटेर समवेदना प्रकट गरेकी छन् ।
 
काठमाडौंको शंखरापुर नगरपालिका–१ स्थित घ्लानको घर पुगेर उनले परिवार र आफन्तलाई समवेदना दिएकी हुन् ।

घ्लानको असामयिक निधनले नेपाली सांगीतिक क्षेत्रमा ठूलो क्षति पुगेको भन्दै घर्तीले दुःख व्यक्त गरिन् । २५ वर्षीया घ्लानको शुक्रवार जोरपाटीस्थित नेपाल मेडिकल कलेजमा उपचारका क्रममा निधन भएको थियो ।

तामाङ भाषाका गीतमार्फत कलाकारितामा फड्को मारेकी घ्लानले थुप्रै म्युजिक भिडियोहरूमा अभिनय गरेकी छन् । घ्लानले अभिनय गरेको टुङ्नाको धुन, डम्फुमा सेलो, दुप्चेश्वर मेला, ल्होछार मेलाजस्ता गीत जनमानसमा लोकप्रिय छन् । उनले अभिनय गरेको ‘मायाभन्दा ठूलो जात होइन, कहाँ पर्‍यो घर’ बोलको म्युजिक भिडियो सार्वजनिक हुने क्रममा छ ।

शुक्रवार नै म्युजिक भिडियो सार्वजनिक गर्ने कार्यक्रम थियो तर घ्लानको निधन भएका कारण रोकिएको छ । 

घ्लान अभिनयमार्फत तामाङ समुदायको मौलिक गीत/संगीतको संरक्षणमा सक्रिय थिइन् ।