नेकपा एमालेको भ्रातृ संगठन युवा संघ विराटनगरका अध्यक्ष किरण लामाविरुद्ध पक्राउ पुर्जी जारी भएको छ । विराटनगर – ८ का ३४ वर्षीय नवल यादव र २४ वर्षीय अभिषेक साहलाई अपहरण तथा शरीर बन्धक बनाएको उनीमाथि आरोप लागेको छ । शरीर बन्धक बनाएको उजुरीको आधारमा मोरङ प्रहरीले जिल्ला अदालतबाट आइतवार दिउँसो पक्राउ पुर्जी जारी गरेको हो ।

मोरङ अदालतका सूचना अधिकारी सुवोद लामाले अपहरण तथा शरीर बन्धक मुद्दामा पक्राउ पुर्जी जारी भएको जानकारी दिएका छन् । मोरङ प्रहरीका प्रवक्ता डिएसपी दीपक श्रेष्ठले पीडितले दिएको उजुरीमाथि अनुसन्धान भइरहेको बताए । प्रहरीमा उजुरी परेपछि लामा भने फरार छन् । उनको खोजी कार्य भइरहेको प्रहरीले जनाएको छ ।

दुवै पीडितलाई शुक्रवार लामाले आफ्नै घरमा बोलाएर बन्धक बनाएका थिए । शुक्रवार नै पीडितले जिल्ला प्रहरी कार्यालय मोरङमा ठाडो निवेदन दिएका थिए । शनिवार भने जाहेरी दरखास्त दिएका थिए । जाहेरीमा लामाका सहयोगी ३२ वर्षीय अनुज मगरलाई पनि विपक्षी प्रतिवादी बनाइएको छ ।

जाहेरीमा जनपथ टोलस्थित घरमा शुक्रवार मध्यान्ह १२ बजे लामाले बोलाएको उल्लेख छ । मिटर ब्याजमा लिएको पैसा नदिएको भन्दै लामाले शुक्रवार दिउँसो दुवै पीडितलाई आफ्नै घरमा बोलाएर बन्धक बनाएर कुटपिट गरेका थिए । लामा समूहका कुटपिटबाट घाइते भएका दुईमध्ये अभिषेक उम्किएर भागेका थिए । उनैले मोरङ प्रहरीलाई घटनाको बारेमा जानकारी दिएपछि प्रहरीले लामाको घर खानतलासी गर्दा बन्धक बनाइएका नवललाई फेला पारेर प्रहरीले उद्धार गरेको थियो ।

विराटनगरको हस्पिटल चौकमा औषधी पसल सञ्चालन गर्ने नवलले लामाबाट गत असार २९ गते पाँच लाख रुपैयाँ सापटी लिएका थिए । यादवले लामासँग फार्मेसी व्यवसाय सञ्चालन गर्न पैसा सापटी लिएका हुन् । लामाले तीन महिनामै पाँच लाख रुपैयाँको मिटर ब्याज कारोबारमा १८ लाख असुलिसकेको आरोप रहेको छ ।