इन्डियन प्रिमियर लिग (आईपीएल) क्रिकेटअन्तर्गत सोमवार राति भएको खेलमा सनराइजर्स हैदराबादलाई ३४ रनले हराउँदै गुजरात टाइटन्सले जितेको छ ।

आईपीएल २०२३ अन्तर्गत नवौं जीत निकाल्दै गुजरात १८ अंकसहित प्लेअफमा पुग्ने पहिलो टीम बनेको छ । हैदराबादले भने आठौं हार व्यहोरेको छ भने अंकतालिकामा ८ अंक मात्रै रहेकाले प्लेअफको दौडबाट बाहिरिएको छ ।

अहमदाबाद खेल मैदानमा भएको ६२औं प्रतिस्पर्धामा शुरूआती ब्याटिङ गर्दै गुजरातले हैदराबादसामु १८९ रनको लक्ष्य दिएको थियो । जवाफी ब्याटिङ गर्दै हैदराबादले २० ओभर खेल्दै ९ विकेटमा १५४ रन मात्रै बनाउन सक्यो ।

गुजरातको जीतका लागि शुभमन गिलले ५८ बलमा १०१ रन बनाउँदै महत्त्वपूर्ण योगदान गरे । उनले १३ चौका र १ छक्का प्रहार गर्दै शतक बनाएका थिए ।