नेपाल राष्ट्र बैंकले मौद्रिक नीतिमार्फत ५० लाख रुपैयाँसम्मको शेयर धितो र २५ लाखसम्मको ‘अटो लोन’मा जोखिम भार कम गरेको छ ।

राष्ट्र बैंकका गभर्नर महाप्रसाद अधिकारीले ५० लाखसम्मको शेयर धितोमा जाने कर्जाको ‘थ्रेस होल्ड’ घटाउने गरी जोखिम भार पुनरवलोकन गर्ने व्यवस्था मौद्रिक नीतिमार्फत गरिएको बताए ।

उनले भने, ‘अहिले २५ लाख रुपैयाँसम्मको शेयर धितो कर्जामा १०० प्रतिशत जोखिम भार छ भने अब ५० लाखसम्म पुर्‍याइने भएको छ ।’

५० लाख रुपैयाँभन्दा बढीको शेयर धितो कर्जामा भने १५० प्रतिशत नै जोखिम भार कायम रहने उनले बताए ।

आवासीय घरकर्जा र अटोलोनमा पनि जोखिम भार पुनरवलोकन गरिएको उनले बताए । अटो लोनमा २५ लाख रुपैयाँसम्मको कर्जामा जोखिम भार १०० प्रतिशत कायम गरिएको छ ।

यसअघि जुनसुकै अटोलोनमा १५० प्रतिशत जोखिम भार रहने व्यवस्था थियो ।

परिवर्तित व्यवस्थाबारे स्पष्ट पार्ने गरी एक साताभित्रमा मौद्रिक नीतिको कार्यान्वयन निर्देशिका आउने छ ।

जोखिम भार कम हुँदा बैंकको कर्जा प्रवाह बढ्ने र बजारलाई चलायामान बनाउन सहयोग पुग्ने अपेक्षा गरिएको छ । 

जोखिम भार बढी भएको क्षेत्रमा बैंकहरूले खासै लगानी गर्दैनन् । जोखिम भार जति बढी हुन्छ त्यही अनुसारको रकम बैंकले प्रोभिजनिङमा राख्नुपर्ने हुन्छ ।