प्रधानमन्त्री पुष्पकमल दाहाल ‘प्रचण्ड’ले काठमाडौंबाट पोखरा जाँदै गरेको बस दुर्घटनामा भएको जनधनको क्षतिप्रति दुःख व्यक्त गरेका छन् । 

धादिङको गजुरी २ चालिसे छहराबाट त्रिशूली नदीमा बस खस्दा ८ जनाको मृत्यु र १३ जना घाइते भएको दुर्घटनाप्रति प्रधानमन्त्रीले दुःख व्यक्त गरेका हुन् । 

‘काठमाडौंबाट पोखरातर्फ जाँदै गरेको यात्रुबाहक बस गजुरी–२ धादिङको राजमार्गबाट त्रिशुली नदीमा खस्दा ८ यात्रुको निधन भएको समाचारले दुखी तुल्याएको छु’ 

प्रधानमन्त्रीले सामाजिक सञ्जालमा लेखेका छन्, ‘सवारी दुर्घटनामा परी ज्यान गुमाउनुहुने मृतकहरूप्रति भावपूर्ण श्रद्धाञ्जली अर्पण गर्दै शोक सन्तप्त परिवार र शुभेच्छुकहरूमा समवेदना प्रकट गर्दछु। साथै घाइते यात्रुहरूको शीघ्र स्वास्थ्य लाभको कामना गर्दै उद्धारकार्य प्रभावकारी बनाउन गृह प्रशासन, सुरक्षा अंग र स्थानीय प्रशासनलगायत सम्बन्धित सबैलाई निर्देशित गर्दछु।’

आज बिहान भएको दुर्घटनामा परी ८ जनाको मृत्यु भएको छ । उद्धार गरिएका १७ मध्ये १३ जनालाई उपचारको लागि काठमाडौं ल्याइएको छ ।