अन्तर्राष्ट्रिय पञ्चाङ्ग निर्णय समितिले यस वर्षको तिहारको भाइटीकाको शुभसाइत सार्वजनिक गरेको छ । समितिले सोमबार जारी गरेको विज्ञप्तिमा विभिन्न देशमा बसोबास गर्ने सनातन धर्मावलम्बीहरुबाट भाइटीकाको साइतबारे राखिएको जिज्ञासालाई सम्बोधन गर्दै अन्तर्राष्ट्रिय साइत सार्वजनिक गर्ने निर्णय गरेको उल्लेख छ ।

समितिका सभापति प्राडा माधव भट्टराईका अनुसार नेपालमा भाइटीकाको उत्तम साइत कात्तिक २९ गते बिहान १० बजेर ५१ मिनेटमा रहेको छ । भारतमा नोभेम्बर १५ को ११ बजेर ५ मिनेट, न्युयोर्क, अमेरिकामा नोभेम्बर १४ को ११ बजेर ५५ मिनेट, टेक्सास, अमेरिकामा नोभेम्बर १४ को ११ बजेर २५ मिनेटमा उत्तम साइत निकालिएको छ । 

यसैगरी वासिङट्न डिसीमा नोभेम्बर १४ को ११ बजेर २१ मिनेट तथा क्यालिफोर्नियामा सोही दिन १० बजेर ५५ मिनेटलाई उत्तम साइत निकालिएको छ । यसैगरी टोरन्टो, क्यानडामा नोभेम्बर १४ को ११ बजेर ४५ मिनेट तथा टोकियो जापानमा नोभेम्बर १५ को बिहान ११ बजेर १५ मिनेटका लागि साइत निकालिएको छ ।

यस्तै अस्ट्रेलियाको मेलबर्नमा सोही दिनको११  बजेर ३४ मिनेट तथा पोर्चगलमा १४ नोभेम्बरको ११ बजेर ५१ मिनेटमा टिका लगाउनुपर्नेछ । यता पेरिसमा बस्नेहरुले सोही दिनको ११ बजेर ५ मिनेट तथा हङकङबासीले नोभेम्बर १५ को बिहान ११ बजेर ५ मिनेटमा भाइटीका लगाउनुपर्नेछ । 

यस्तै साउदी अरेबियामा रहेका नेपालीले भाइटीका लगाउन नोभेम्बर १५ को बिहान ११ बजेर ४५ मिनेटमा उत्तम साइत रहेको छ । समितिले त्यहाँको स्थानीय समयअनुसार टीकाको समय तय गरेको हो ।

यद्यपि यो साइतको पनि उत्तम साइतमात्रै निर्धारण गरिएकाले भाइटीकाको दिन जुकसुकै बेला लगाउन पनि कुनै बाधा नगर्ने भट्टराईको भनाइ छ ।