गण्डकी प्रदेशमा यही फागुन १३ गतेदेखि दादुरा–रुबेला खोप अभियान २०८० अभियान शुरू हुने भएको छ । मनाङ र मुस्ताङ जिल्लाबाहेकका २ लाख ५३ हजार ३५ जना बालबालिकालाई दादुरा–रुबेला खोप दिने स्वास्थ्य निर्देशनालय गण्डकी प्रदेशले जानकारी दिएको हो । 

सरकारले सन् २००४ देखि प्रत्येक ४–४ वर्षको अन्तरालमा यो अभियान सञ्चालन गर्दै आएको छ । यो वर्ष गण्डकीका हिमाली जिल्लाबाहेक ९ जिल्लामा ९ महिना पूरा गरेका र ५ वर्षभित्रको उमेर समूहका सबै बालबालिकालाई खोप लगाइँदै छ । यो अभियानअन्तर्गत नियमित खोप लगाउन छुटेका बालबालिकालाई पनि खोपको मात्रा प्रदान गर्ने व्यवस्था निर्देशनालयले गरेको छ । 

नवलपरासी बर्दघाट सुस्ता पूर्वमा भने ९ महिनादेखि १५ वर्ष मूनिका बालबालिकाहरुलाई खोप दिइँदै छ । प्रदेशका जिल्लामध्ये सबैभन्दा बढी नवलपरासी पूर्वमा १ लाख २२ हजार बालबालिकालाई खोप लक्षित गरिएको छ भने सबैभन्दा कम म्याग्दीमा ६५०० बालबालिकालाई खोप लक्षित गरिएको छ । 

कास्कीमा ३४ हजार ९२५, लमजुङ ९ हजार ८१५, तनहुँ २० हजार ४८०, पर्वत ८ हजार ६११, बागलुङ २० हजार, गोरखा १४ हजार ७०४ र स्याङ्जामा १६ हजार जना बालबालिकालाई लक्षित गरिएको छ । यो अभियानअन्तर्गत प्रदेशका २ हजार ८८९ वटा खोप सेसनबाट २ लाख ५३ हजार ३५ जना बालबालिकालाई खोप लगाउन २ हजार ८८९ जना स्वास्थ्यकर्मी र ५ हजार ७७८ स्वयंसेवक परिचालित हुँदै छन् । 

फागुन १३ बाट गण्डकीसँगै देशैभर सञ्चालन हुने यो खोप अभियान चैत ७ गतेसम्म सञ्चालन हुने छ । विश्व स्वास्थ्य संगठन (डब्लूएचओ)ले दादुरा–रुबेला खोपलाई प्राणघातक रोगमा वर्गीकरण गरेको छ । सरकारले २०२६ सम्म नेपालबाट यो रोग निवारण गर्ने लक्ष्य राखेको छ । यसवर्ष मात्र देशका १८ जिल्लाका २० स्थानमा महामारी फैलिइ करिब १ हजार ३०० भन्दा बढी व्यक्ति रोगबाट प्रभावित भएका थिए । जसमा गण्डकीको तनहुँ जिल्ला शुक्लागण्डकी नगरपालिकामा समेत यो रोगको देखिएको स्वास्थ्य निर्देशनालयले जनाएको छ । यही पुष र माघमा शुक्लागण्डकीमा ३ जना बालबालिकामा यो रोगको संक्रमण देखिएको थियो । 

विश्व स्वास्थ्य संगठन, गण्डकीका मेडिकल अफिसर रामु शर्माका अनुसार सरकारले ८४ प्रतिशतलाई खोप सेवा दिन सकेको छ । यो खोपबाट अझैपनि १६ प्रतिशत बालबालिका छुटेका छन् । यो रोगबाट विशेषगरी बालबालिका बढी प्रभावित हुने भएकाले यसले उनीहरूमा अन्य संक्रामक रोगहरूको सम्भावना बढाउने चिकित्सक बताउँछन् ।