नेपाली कांग्रेसका सांसद दीपक गिरीले सहकारी ठगीमा जोडिएका रास्वपा सभापति रवि लामिछानेलाई गृहमन्त्रालयको जिम्मेवारी दिइएकोमा आपत्ति जनाएका छन् ।

प्रतिनिधि सभाको आजको बैठकमा सांसद गिरीले सहकारी ठगीमा जोडिएका दीपेश पुन पक्राउ पर्नु तर सोही खालको उजुरी दिएका रविलाई गृहमन्त्रालयको जिम्मेवारी दिएकोप्रति आपत्ति जनाएका हुन् ।

बैठकको शुरूमै सभामुखसँग समय लिएर कांग्रेस दीपक गिरीले गृहमन्त्री लामिछानेले राजीनामा दिनु नै कांग्रेसको अडान रहेको बताए ।

‘पोखरा सूर्य दर्शन बचत सहकारी पीडितले माघ २२ गते रास्वपाका सभापति रवि लामिछाने र दीपेश पुनविरुद्ध उजुरी दिएका थिए । दीपेश पुन गिरफ्तार भए, रवि लामिछानेले अझै ठूलो पद पाउनु भएको छ’, गिरीले भने, ‘प्रहरीले अनुसन्धान अगाडि बढाएको थियो, सीआईबीले सघाइरहेको थियो । तत्कालीन गृह मन्त्रीले छानबिन गर्न दिनुभएको थियो । तर रविलाई जसरी पनि गृह मन्त्रालय चाहिन्छ भन्नेले अनुसन्धान प्रभावित गर्न खोजेको देखियो ।’

आफैंले आफैंलाई कारबाही गरेको नजिर नरहेकोले रविले गृह मन्त्रालयबाट राजीनामा दिनुपर्ने उनले बताए ।

सहकारीको सदस्य नरहेका रवि सहकारी ठगीमा फरार जीबीका तत्कालीन व्यापारिक साझेदार रहेकोले पनि उनीमाथि अनुसन्धान हुनुपर्ने उनको माग थियो ।

प्रधानमन्त्री प्रचण्ड उपस्थित संसद् बैठकमा गिरीले भने ‘स्वार्थको द्वन्द्व हुने गरी रविलाई किन गृहमन्त्री बनाइएको गरेको हो ? फायर साइडमा जवाफ दिएर हुँदैन, संसद्‌मा जवाफ चाहिन्छ ।’