साढे २ अर्बमाथिको कृषि सहकारी ठगी प्रकरण: मोबाइल नम्बर र ठाउँ फेरीफेरी बस्थे अध्यक्ष र सञ्चालक

साढे २ हजार बचतकर्ताको २ अर्ब ५० करोडभन्दा बढी रकम हिनामिनाको आरोपमा पक्राउ परेका कृषि विकास बहुद्देश्यीय सहकारी संस्थाका अध्यक्ष तेजविक्रम थापासहित ४ जनालाई प्रहरीले सार्वजनिक गरेको छ । 

काठमाडौं उपत्यका अपराध अनुसन्धान कार्यालयले आइतबार पत्रकार सम्मेलन गरी थापासहित संस्थाकी व्यवस्थापक सजना राजकर्णिकार तथा सदस्यहरू भीमसेन महर्जन र सञ्जय सापकोटालाई सार्वजनिक गरेको हो ।

उनीहरूविरुद्ध ५६६ जना बचतकर्ताका तर्फबाट ६५ वटा जाहेरी परेको छ । जाहेरीमा उल्लेख भएको ठगी रकम ९४ करोड २३ लाख ४२ हजार रहेको प्रहरीले जनाएको छ । 

संस्थामा कुल २ हजार ५३१ बचतकर्ताले २ अर्ब ५० करोड रुपैयाँ जम्मा गरेको देखिएको प्रहरीले जनाएको छ । जाहेरी पर्न बाँकी रहेको उक्त रकम समेत ठगीको दायरामा आउने देखिन्छ ।

आकर्षक ब्याज दिने र भनेको बेलामा उपलब्ध गराउने प्रलोभन देखाई रकम जम्मा गर्न लगाएर अपचलन गरेको भन्दै उनीहरूविरुद्ध जाहेरी परेको थियो । 

जिल्ला प्रहरी परिसर ललितपुरमा २०८० मंसिर १९ मा जाहेरी दर्ता भई अनुसन्धान शुरू भएकोमा माघमा जिल्ला अदालत ललितपुरले पक्राउको अनुमति दिएको थियो ।

त्यसयता फरार रहँदै आएका अध्यक्ष थापा तथा सञ्चालक समिति सदस्यहरूलाई २०८१ जेठ ३२ गते शुक्रबार विभिन्न स्थानबाट पक्राउ गरिएको प्रहरीले जनाएको छ ।

पक्राउ परेका थापा र राजकर्णिकार पति-पत्नी हुन् । उनीहरू मोबाइल नम्बर परिवर्तन गरेर ठाउँ फेरि-फेरि बस्ने गरेको पाइएको प्रहरीले जनाएको छ ।

थापाविरुद्ध बैंकिङ कसुरमा झण्डै पौने ३ करोडका ५ वटा मुद्दा समेत रहेको प्रहरीले जनाएको छ । दुईवटा मुद्दामा उनीमाथि कारबाही भएको छ भने ३ वटामा उनी फरार प्रतिवादी छन् ।

उनीहरूको साथबाट बा २५ च ४२९६ नम्बरको इको भ्यान, ६ थान मोबाइल, ३ थान पेन ड्राइभ, ३ थान हस्ताक्षरसहितको चेकलगायत सामग्री बरामद गरिएको अपराध अनुसन्धान कार्यालयका एसपी अंगुर जीसीद्वारा हस्ताक्षरित विज्ञप्तिमा उल्लेख छ ।