काठमाडौं, १७ कात्तिक– दोस्रो चरणअन्तर्गत आगामी मंसिर २१ गते देशका मध्य पहाडी र तराईका ४५ जिल्लामा प्रदेश र प्रतिनिधिसभा सदस्यको निर्वाचन हुँदैछ । दोस्रो चरणमा प्रतिनिधिसभा प्रत्यक्षतर्फ १२८ र प्रदेशसभा प्रत्यक्षतर्फ २५६ निर्वाचन क्षेत्रमा चुनाव हुन लागेको हो ।

जसका लागि हिजो (बिहीवार) उम्मेदवारको मनोनयन पनि दर्ता भइसकेको छ । ४५ जिल्लामा प्रतिनिधिसभा प्रत्यक्षतपर्फ १७४२ र प्रदेशसभातर्फ २९६६ जनाको उम्मेदवारी परेको छ ।

उम्मेदवारी दिएकामध्ये सबैजना राम्रा र सही आचरण भएका नहुन पनि सक्छन् । कतै तपाईंको निर्वाचन क्षेत्रमा गलत आचरण भएका व्यक्तिको उम्मेदवारी त परेको छैन ? यदि खराब आचरण भएको व्यक्तिले उम्मेदवारी दिएको तपाईंले भेट्टाउनुभयो भने उम्मेदवारी खारेजीको माग गर्दै प्रमाणसहित सम्बन्धित क्षेत्रका मुख्य निर्वाचन अधिकृत तथा निर्वाचन अधिकृतकाे कार्यालयमार्फत निर्वाचन आयोगमा उजुरी गर्न सकिने छ ।

निर्वाचन आयोगले बिहीवार मनोनयन दर्ता गरेका उम्मेदवारविरुद्ध उजुरी दिन शुक्रवारको समय तोकेको छ । आयोगका प्रवक्ता नवराज ढकालका अनुसार शुक्रवार विहान १० बजेदेखि साँझ ५ बजेसम्म उम्मेद्वारविरुद्ध उजुरी दिन सकिने छ ।

सार्वजनिक अपराध, भ्रष्टाचार, जबरजस्ती करणी, हातहतियार तथा खरखजाना, कर्तव्य ज्यानलगायत मुद्दामा दोषी ठहर भएका व्यक्तिले उम्मेदवारी दर्ता गराएको पाइएमा त्यस्ता व्यक्तिविरुद्ध प्रमाणसहित उजुरी दिए उनीहरुको उम्मेदवारी खारेज हुने छ ।

शुक्रवार उम्मेदवारविरुद्ध दिइएको उजुरीउपर निर्वाचन अयोगले छानविन गर्ने छ । आयोगले उम्मेदवारको मनोनयनपत्र र उजुरीमाथि छानविन गरी कात्तिक १८ गते उम्मेदवारको अन्तिम नामावली प्रकाशन गर्ने छ ।

उम्मेद्वारी फिर्ता लिनेका लागि भने १९ गतेसम्म समय दिइने निर्वाचन आयोगका प्रवक्ता ढकालले बताए । उनका अनुसार उम्मेदवारहरुलाई १९ गते नै चुनाव चिह्न प्रदान गरिने छ ।

पहिलो चरणअन्तर्गत उच्च पहाडी र हिमाली ३२ जिल्लामा मंसिर १० गते हुने निर्वाचनका लागि कात्तिक ५ गते नै उम्मेदवारहरुको मनोनयन दर्ता भइसकेको छ । पहिलो चरणमा चुनाव लड्ने उम्मेदवारको अन्तिम नामावली प्रकाशन भइ चुनाव चिह्न समेत प्रदान गरिसकिएको छ ।

---

---