पञ्जा र दाह्राका लागि गरियो सिंहहरूको वीभत्स हत्या

काठमाडौं – दक्षिण अफ्रिकामा शिकारीहरूले सिंहको पञ्जा र दाह्रा निकाल्नका लागि विष हालिएको कुखुरो खुवाइएको छ । कुखुरो खाएपछि सिंहहरू तड्पी तड्पी मरेका छन् । 

मुटु नभएका हत्याराहरूले विषाक्त कुखुरा फालेपछि भाले सिंह थोर र मम्फोर्ड अनि सेता सिंहिनीहरू आइसिस र मिया त्यसलाई खाएर तड्पिएर मरे । 


Advertisement

उनीहरूले मरेका सिंहको पञ्जा र दाह्रा काट्नका लागि धारिलो हतियार तिखारिरहँदा सिंह राखिएको ठाउँनिरका कुकुरहरू बेस्सरी भुक्न थाले । 

कुकुर भुकेको सुनेर बिहान सखारै उठेका मानिसले शिकारीहरूलाई लघारे । लायन पार्कका गार्डहरू सिंह भएतिर दौडिँदै जाँदा ६ मध्ये चार सिंह मरिरहेको भेटे । 

सिंह पाल्ने व्यक्ति हेन्नी पियोले भने, ‘मैले यी सिंहहरूलाई ११ वर्षदेखि स्याहार गरिरहेको थिएँ । मेरी पत्नी इसाबेल र मैले तीनवटा सिंहलाई बोतलको दूध समेत पिलाएका थियौं । यस्तो जघन्य अपराध गर्नेप्रति मेरो चरम घृणा छ ।’

‘यी सुन्दर जनावरहरूलाई काटेर अंगहरू चोर्ने अनि काला जादूका लागि सामग्री बनाउनेलाई बेच्ने गिरोहले यो काम गरेको हुनुपर्छ । यस्तो घटना बाक्लै हुने गरेको छ र कोही पनि पक्राउ परेको छैन । मैले मेरा चार घनिष्ठ मित्र गुमाएँ तर पापीहरूले उनीहरूलाई काट्न नपाएकोमा पनि आभारी छु ।’

एजेन्सी

कमेन्ट गर्नुहोस्