आन्तरिक राजस्व कार्यालय धनगढीले सुदूरपश्चिम प्रदेशको ५ जिल्लास्थित उत्कृष्ट करदातालाई सम्मान गरेको छ ।

आठौं राष्ट्रिय कर दिवसको अवसरमा शनिबार धनगढीमा सो कार्यालयले एक कार्यक्रमका बीच आव २०७४/२०७५ मा जिल्लामै सबैभन्दा बढी कर भुक्तानी गर्ने करदातालाई सम्मान गरेको हो ।

कैलाली, डोटी, अछाम, बजुरा र बझाङ जिल्ला कार्यक्षेत्र रहेको सो कार्यालयको उत्कृष्ट करदाताको रूपमा सम्मानित हुनेमा सहकारी संस्थादेखि व्यवसायिक कुखुरापालक कृषक समेत परेका छन् ।

सो कार्यालयको आब २०७४/२०७५ कर भुक्तानी प्रतिवेदन अनुसार सुदूरपश्चिमकै प्रमुख व्यापारिक क्षेत्र मानिने कैलालीको ठूला–ठूला व्यावसायिक प्रतिष्ठान, उद्योगिक घरानाहरुलाई उछिन्दै कैलालीको लम्कीमा प्रधान कार्यालय रहेको किसान बहुउदेश्यीय सहकारी संस्था लिमिटेडले जिल्लाको उत्कृष्ट करदाताको सम्मान ग्रहण गर्न सफल भएको छ ।

सो संस्थाका अध्यक्ष सुरेन्द्रकुमार शाहलाई दोसल्ला ओढाएर सम्मान पत्रसहित सम्मानित गरिएको थियो ।

२०५२ मा स्थापना भएको सो सहकारी संस्थाको कैलालीमा २१ वटा सेवा केन्द्र रहेको छ । भने ५२ हजार शेयर सदस्य पुगेका छन् ।

१७२ जना कर्मचारी कार्यरत सो संस्थाको वार्षिक कारोबार ३ अर्ब १५ करोड पुगेको छ । भने पूँजी कोष ३० करोड नाघेको संस्थाका महाप्रबन्धक डम्बर बहादुर शाहले जानकारी दिए । 

यसअघि पनि जिल्लाको उत्कृष्ट करदाताको रुपमा ख्याति कमाएको सो संस्थाले आब २०७५/२०७६ मा मात्रै ८ करोड मुनाफा कमाएको छ ।

त्यस्तै, अछाम जिल्लामा सबैभन्दा बढी कर भुक्तानी गर्ने करदातामा मोहमद सकिल टे«डर्स एन्ड सप्लायर्स तथा मोहम्मद सकिल कन्स्ट्रक्सन एण्ड सप्लायर्स छनौटमा परेको थियो । सो फर्मका सञ्चालक मोहमद अक्रामुल शेषलाई पनि उत्कृष्ट करदाताको रूपमा सम्मान गरिएको थियो ।

०६१ देखि भ्याटमा दर्ता भई सञ्चालन हुँदै आएको सो फर्मले वार्षिक ४ देखि ५ करोडसम्मको कारोवार गर्दै आएको छ ।

बझाङ जिल्लाको उत्कृष्ट करदाताको रूपमा सोलन पोल्ट्री फर्म तथा सुलोन इन्टरप्राइजेज हुन सफल भएको छ । युवा उद्यमी नरेन्द्रबहादुर खड्काद्वारा सञ्चालित सो फर्मले कुखुरापालन, कुखुराको दाना खरिदबिक्री गर्दै आएको छ ।

०६७ देखि बझाङमा कारोबार शुरू गरेको फर्मले वार्षिक ४ करोड बढीको कारोबार गर्दै आएको छ । फर्मका सञ्चालक खड्का बझाङस्थित रेडियो जनमुखी एफएमको अध्यक्ष पनि हुन् ।

डोटी जिल्लामा व्यवसायी जंगबहादुर रावलद्वारा सञ्चालित जेबी टे«डर्स जिल्लाकै उत्कृष्ट करदाता हुन सफल भएको छ । भने बाजुरा जिल्लामा फुगी जैसीद्वारा सञ्चालित डीबी खाद्य आपूर्ति अडर एन्ड सप्लायर्स तथा डीबी कन्स्ट्रक्सन एन्ड सप्लायर्स जिल्लाको उत्कृष्ट करदाताको रूपमा सम्मानित भएको हो ।

ती ५ जिल्लाका उत्कृष्ट करदाताहरुलाई कैलालीका प्रमुख जिल्ला अधिकारी यज्ञराज बोहरा र आन्तरिक राजस्व कार्यालय धनगढीका प्रमुख चन्द्रकुमार श्रेष्ठले सम्मानित गरेका थिए ।