राम जानकी विवाह पञ्चमीमा भिडभाडको फाइदा उठाउँदै जनकपुरमा ब्यापक संख्यामा पकेटमारहरू परिचालित भएका छन् ।

नेपाल र भारत बाट लाखौँको संख्यामा तिर्थालु भक्तजनहरू विवाह पञ्चमी हेर्न आएको मौका छोपेर नेपाल र भारत बाट सयौंको संख्यामा पाकेटमारहरू समेत परिचालित भएका छन् । 

सशस्त्र प्रहरी बल धनुषाका प्रहरी उपरीक्षक राजेश उप्रेतीका अनुसार आइतवार बिहान १० बजे सम्ममा जानकी मान्दिरको परिषर बाट कुल १३ जना पाकेटमारहरूलाई पक्राउ गरेर जिल्ला प्रहरी कार्यालय धनुषामा बुझाइएको छ ।  पक्राउ परेका महिला पाकेटमारहरू भारतको रहेको उनले बताए ।

ड्रोनदेखि सिसिटिभी क्यामेरा हुँदै तालिम प्राप्त कुकुर समेत परिचालन 

शान्ति सुरक्षा ब्यवस्था मिलाउनका लागि हजारौंको संख्यामा सुरक्षाकर्मीहरू परिचालन गरिएको छ । त्यसका बाहेक जनकपुरको जानकी मन्दिर देखि रंगभुमी मैदान बारबिघा सहित महत्वपूर्ण स्थानहरूमा सिसीटिभी क्यामेरा जडान गरेर निरीक्षण समेत गरिएको छ ।

जानकी मन्दिरमा नै सिसिटिभी क्यामेरा मोनिटरिंग कार्यालय स्थापाना गर्नुका साथै संयुक्त सुरक्षा व्यबस्थाको प्रमुख मुकाम समेत त्यहीं तोकिएको धनुषाका प्रमुख जिल्ला अधिकारी प्रदीपराज कणेलले बताए ।

‘हामीले जानकी मन्दिरको एउटा कोठामा नै सम्पूर्ण सुरक्षा ब्यबस्था निगरानीका लागि कमाण्ड कन्ट्रोल रुम समेत स्थापना गरेका छौं,’ सिडिओ कणेलले भने, ‘त्यहीं बाट सिसिटिभी देखि सम्पूर्ण सुरक्षा अवस्थाको निगरानी गरिरहेका छौं ।’ पहिले जिल्ला प्रशासन कार्यालयमैं कमाण्ड कन्ट्रोल रुम हुने गरेकोमा यस पटक जानकी मन्दिरमा नै स्थापना गरिएको छ । 

‘कमाण्ड कन्ट्रोल रुममा नेपाल प्रहरी र सशस्त्र प्रहरी दुवै जनाको एसपी सा’ब को नियन्त्रणमा संचालित भएको छ,’ सशस्त्र प्रहरी बल धनुषाका एसपी उप्रेतीले भने, ‘जानकी मन्दिरमा आउने दर्शालु भक्तजनलाई सहज रुपमा दर्शन हुन सकोस् तथा विवाह पञ्चमीको सम्पूर्ण कार्यक्रमहरू सुरक्षित तरिकाले सम्प्पदन गर्न सकियोस भन्ने उद्देश्यले संचालन गरिएको हो ।’ यसका बाहेक ड्रोन क्यामेरा बाट समेत निरीक्षण गरिएको छ ।

धनुषाको मिथिलानगर नगरपालिकाको लालगढ स्थित प्रदेश नम्बर २ को प्रहरी कार्यालयको केनायन शाखाका दुई वटा कुकुर समेत परिचालन गरिएको छ । जिल्ला प्रहरी कार्यालय धनुषाका प्रहरी नायब निरीक्षक बब्लु ठाकुरका अनुसार बिष्फोटक पदार्थ पहिचान गर्न सक्ने तालिम प्राप्त कुकुर ‘बाणी’ र लागु औषध सम्बन्धि तालिम प्राप्त अर्को कुकुर ‘रोजी’ परिचालन गरिएको छ ।

त्यसै गरी विवाह पंचमीमा सुरक्षा ब्यबस्था मिलाउनका अलागी बाहिर बाट समेत प्रहरी झिकाएर परिचालन गरिएको छ । जिल्ला प्रहरी कार्यालय धनुषाका प्रहरी उपरीक्षक शेखर खनालका अनुसार जिल्ला प्रहरी कार्यालयहरू सिरहा, सप्तरी, सर्लाही, दंगा नियन्त्रण प्रहरी गण ढल्केवर, संघीय प्रहरी इकाई कार्यालय जनकपुर, प्रदेश सशस्त्र प्रहरी गण जनकपुर, प्रदेश २ को प्रहरी कार्यालय, संघीय प्रहरी गुल्म जनकपुर सहित बाट थप सुरक्षाकर्मी झिकाएर परिचालित गरिएको छ ।

धनुषाको ढल्केवर बाहेक मातहतको सम्पूर्ण इलाका प्रहरी कार्यालयका प्रहरी निरीक्षकहरू समेत बोलाएर जनकपुर उपमहानगरको नगर क्षेत्रमा मात्र परिचलान गरिएको छ । ७ सय ५० जना सशस्त्र प्रहरी समेत परिचालित छन् । त्यसै गरी सादा पोशाकमा समेत व्यापक रुपमा सुरक्षाकर्मी परिचालित गरिएको छ ।