चीनको कोरोनाग्रस्त क्षेत्रबाट नेपाली ल्याउनुपूर्व सरकारले यी तयारी गर्नुपर्छ:

उनीहरू पनि सुरक्षित होउन्, यहाँ कसैलाई नसरोस् भन्ने प्रत्याभूति सरकारले दिनुपर्दछ । चीनको वुहानमा फसेका नेपालीलाई उद्दार गर्नु सरकारको कर्तव्य हो ।

उनीहरू संक्रमित नहोलान् तर १ जना मात्र संक्रमित भएमा त्यो संक्रमण धान्न मुस्किल पर्नेछ ।

१. चालक दललाई त्यहाँ सुरक्षित रूपमा पुर्‍याउनु पर्दछ । त्यहाँका नेपालीलाई आइसोलेसन गाउन, ह्यान्ड ग्लोभ, मास्क, हेड क्याप लगाएर ल्याउनुपर्छ ।

२. ती १८० जनामध्ये १ जनालाई पनि संक्रमण नभएको ग्यारेन्टी हुनुपर्दछ । १-२ जनालाई संक्रमण भएको रहेछ भने प्लेन भित्रका सबै जनालाई सर्न सक्छ ।

३. यहाँ एयरपोर्टमा ल्यान्ड गरेपछि आइसोलेसन सेन्टरमा पुर्‍याउने बेला अरूलाई नसरोस् भनेर विश्वस्त उपाय अपनाउनुपर्छ ।

४. आइसोलेसन सेन्टरमा १ कोठामा १ जना राख्ने, एट्याच बाथरूम हुनुपर्ने, एकलाई अर्कोसँग भेट नगराउने, भर्‍याङ, सिंढी, कोरिडोरमा एकअर्काको श्वास नजाने वातावरण मिलाउनुपर्छ । अन्यथा ती १८० जनामध्ये एक जनालाई मात्र रहेछ भने पनि अरूलाई सर्न सक्छ । होटलमा वा होस्टेलमा राखेजस्तो कोठा सेयरिङ गर्न मिल्दैन ।

५. उनीहरूलाई खानापानी, पत्रिका, पुस्तक आदि पुर्‍याउनका लागि सुरक्षित उपायको व्यवस्था गर्नुपर्छ ।

६. आइसोलेसन सेन्टरको फोहोर जलाउने व्यवस्था गर्नुपर्छ ।

७. त्यो केन्द्र वरिपरिको बस्तीलाई रोग नसर्ने प्रत्याभूति गराउनुपर्छ । बस्ती भएको ठाउँमा आइसोलेसन सेन्टर राख्न मिल्दैन ।

८. आइसोलेसन केन्द्रमा नियमित जाँचको व्यवस्था मिलाउनुपर्छ, त्यसका लागि चिकित्सक तथा अन्य स्वास्थ्यकर्मीलाई सुरक्षित बनाउने उपायको व्यवस्था गर्नुपर्छ ।

९. १४ दिन आइसोलेसन केन्द्रमा राखेपछि उनीहरू १००% निस्संक्रमित भएको आधिकारिक रिपोर्ट दिएर परिवारलाई जिम्मा लगाउनुपर्छ ।

१०. लामो मानसिक पीडा भोगेका उनीहरूलाई मनोवैज्ञानिक परामर्शको व्यवस्था गर्नुपर्ने हुनसक्छ ।

११. आइसोलेसन सेन्टरलाई सधैँ निर्मलीकरण गर्नुपर्दछ । १४-१८ दिनसम्म त्यहाँ बसेर घर फिर्ता भएपछि त्यो केन्द्रलाई पूर्णरूपमा Sterilized गर्नुपर्छ ।

डा. रवीन्द्र पाण्डे, जनस्वास्थ्य विज्ञ (फेसबूकबाट)