निगमको जहाज इन्जिन मर्मतमा ढिलाइ भएको प्रकरणः क्षतिपूर्ति दाबी गर्न कार्यकारी अध्यक्षको निर्देशन

नेपाल वायुसेवा निगमले नाइन–एकेएक्स जहाजको इन्जिन मर्मतमा ढिलाइ भएको विषयमा छानबिन गर्न उपसमिति गठन गरेको छ ।

गत वैशाख २३ गते निगमका कार्यकारी अध्यक्ष युवराज अधिकारीको अध्यक्षतामा बसेको सञ्चालक समितिको बैठकले सञ्चालक समिति सदस्य क्या सुधीरशमशेर राईको संयोजकत्वमा पाँच सदस्यीय छानबिन उपसमिति गठन गरेको हो ।

सो उपसमितिलाई छानबिन एवम् अध्ययन गरी १५ दिनभित्र उपयुक्त राय सिफारिससहित प्रतिवेदन पेश गर्न कार्यादेश दिइएको निगमका प्रवक्ताद्वय रमेश पौडेल र देवेन्द्र पुनले शुक्रबार जारी गरेको विज्ञप्तिमा उल्लेख छ ।

‘उक्त समितिलाई निगमको जहाजको इन्जिन आईएआईमा मर्मत–सम्भार गर्न पठाएकोमा समयमा नआएको र भाडाको इन्जिन समयमा नदिएको सम्बन्धमा छानबिन एवम् अध्ययन गरी १५ दिनभित्र उपयुक्त राय सिफारिससहित प्रतिवेदन पेश गर्न कार्यादेश दिइएको छ,’ विज्ञप्तिमा उल्लेख छ । 

यसअघि कार्यकारी अध्यक्ष अधिकारीबाट निगम र इजरायल एरोस्पेस इन्टस्ट्री (आईएआई)बीच भएको सम्झौताबमोजिम कार्य गर्न र ढिलाइ भएकोमा क्षतिपूर्तिसमेत दाबी गर्नु भनी मिति गत चैत २२ मा सीएम डिपार्टमेन्टमा निर्देशनसमेत भइसकेको विज्ञप्तिमार्फत जनाइएको छ ।

‘यस विषयमा वैशाख १७ गते बसेको निगम कार्यकारी समितिबाट कार्यकारी अध्यक्षले दिएको आदेशबमोजिम पहिलेको इन्जिन मर्मतमा भएको ढिलाइ र अर्को इन्जिन सम्झौताको शर्तअनुसार समयमा दिन नसकेको विषयमा विस्तृत विश्लेषण गरी क्षतिपूर्ति दाबी गर्न सीएम डिपार्टमेन्टले कार्य अघि बढाउने भनी निर्णय भएबमोजिम आवश्यक कार्य प्रारम्भसमेत भइसकेको छ,’ विज्ञप्तिमा भनिएको छ ।