काठमाडौं– श्रम, रोजगार तथा सामाजिक सुरक्षामन्त्री गोकर्ण विष्टले चलचित्र ‘गोपी’को टिमसँग भेटघाट गरेका छन् । 

सिंहदरबारस्थित मन्त्रालयको कार्यकक्षमा मंगलबार उनले चलचित्रका कलाकार, निर्माता तथा निर्देशकलाई भेटेका हुन् । मन्त्री विष्टसँगको भेटघाटमा चलचित्रका मुख्य कलाकार विपिन कार्की, सुरक्षा पन्तसंगै निर्देशक दीपेन्द्र लामा, निर्माता मणिकर्ण केसी, कार्यकारी निर्माता श्रीधर पौडेल र लेखक सामीप्यराज तिमल्सेना सहभागी थिए । 

सो भेटमा मन्त्री विष्टले चलचित्रको ट्रेलरले आफूलाई उत्सुक बनाएकाले थप जानकारीका लागि चलचित्र निर्माण टिमसँग साक्षात्कार गर्न चाहेको बताए । ‘चाह्यो भने देशमै पनि धेरै कुरा गर्न सकिन्छ भन्ने चलचित्रको विषय रहेछ । अहिले सरकारले पनि स्वरोजगार र स्वावलम्बनको कुरालाई प्राथमितामा राखेको छ । सरकारको धारणालाई चलचित्रले समेटेको देख्दा एकदमै खुशी लाग्यो,’ मन्त्री विष्टले भने, –‘चलचित्रप्रति श्रम मन्त्रालय र व्यक्तिगत रुपमा मेरो पनि नैतिक समर्थन र ऐक्यवद्धता छ ।’ 

मन्त्री विष्टले आफूले यदाकदा नेपाली चलचित्र हेर्ने गरेको भएपनि मौलिक चलचित्र कमै बन्ने गरेको बताए । भेटघाटका क्रममा उनले चलचित्रको बजेट र सुटिङ सम्बन्धी जिज्ञासा पनि राखेका थिए । निर्देशक दीपेन्द्र लामाले श्रममन्त्रीले चलचित्रप्रति देखाएको चासोले आफू र आफ्नो टिमलाई हौसला मिलेको बताए । ‘विदेश नताकेर देशमै पसिना बगाउने युवाहरुको ठूलो जमात पनि ठूलो छ । त्यो समूहलाई चलचित्रको माध्यमबाटै भएपनि हौसला प्रदान गर्ने उद्देश्यले देशमै केही गर्न खोज्ने युवाको कथा भन्ने प्रयास गरेका छौं,’ लामाले भने, –‘हाम्रो काममा मन्त्रीको नजर परेकोमा हामी आफ्नो उद्देश्यमा केही सफल भएको महशुस भएको छ ।’

लेखक सामीप्यराज तिमल्सेनाले चलचित्रले कृषिकर्म गर्ने लाखौं किसानको मुद्दालाई समेट्ने बताउँदै देश छाड्न चाहाने युवालाई फरक तरिकाले सोँच्न प्रेरित गर्ने बताए । उनले पनि मन्त्रीको चलचित्रप्रतिको चासोले ‘गोपी’लाई मात्र होइन, मौलिक कथामा चलचित्र बनाउन चाहने थुप्रै चलचित्रकर्मीलाई प्रेरित गर्ने बताए ।