जनकपुरधाम- राष्ट्रिय जनता पार्टी (राजपा)नेपालको अध्यक्षमण्डलको संयोजकमा शरतसिंह भण्डारी नियुक्त भएका छन् ।

बुधवारदेखि उनको नेतृत्वमा राजपाले निर्णय गर्नेछन् । यसअघि महेन्द्र राय संयोजक थिए । शुरूमा महन्थ ठाकुर नै लामो समय संयोजक भएपछि राजेन्द्र महतो र महेन्द्र राय संयोजक भइसकेका छन् । दुई-दुई महिनामा आलोपालो संयोजक परिवर्तन गर्ने सहमति अनुसार संयोजक परिवर्तन हुँदै आएको छ ।

राजपाका महासचिव केशव झाका अनुसार भण्डारीको नेतृत्वमा पार्टीको महाधिवेशन निर्धारित समयमा नै सम्पन्न गराउनु ठूलो चुनौती रहनेछ । आगामी वैशाख ७ देखि ९ गतेसम्म पार्टीको महाधिवेशनको मिति यस अघि नै निर्धा्रित भइसकेको छ ।

पार्टीलाई व्यवस्थित गर्दै पार्टीभित्र देखिएका अलग-अलग गुटको व्यवस्थापन गर्नु पनि अर्को चुनौती हुने झाले बताए । अहिले पनि राजपाले साधारण सदस्यता वितरण गर्दै आएकोमा त्यसको म्याद चैत्र १५ गते सम्मको लागि बढाइएको छ । ‘हालसम्म ३५ वटा जिल्लामा ८ लाख सदस्यता वितरण गरिएको छ,’ राजपा महासचिव झाले भने, ‘जनमुक्ति पार्टीको पनि राजपामा एकीकरण भएपछि सदस्यता बढ्नेछ ।’ जनमुक्ति पार्टीले विभिन्न ४० जिल्लामा आफ्नो संगठन रहेको दाबी गर्दै आएकोले त्यहाँ पनि सदस्यता वितरण गरिने काम जारी रहेको उनले बताए ।

सरकारलाई दिएको समर्थन फिर्ता लिएपछि सदनमा निरन्तर संघर्ष गर्दै आएको राजपालाई राष्ट्रव्यापी आन्दोलन गर्नका लागि सडकमा पनि व्यवस्थापन गर्नुपर्ने दायित्व भण्डारीको काँधमा आएको झाले बताए ।