काठमाडौं – कोटेश्वर–बल्खु–कलंकी सडक विस्तारपछि पनि दुर्घटनाको भयावह रुप देखिएको छ ।

साउन महिनापछि कोटेश्वर–कलंकीको चिल्ली सडक खण्डमा नै २७ जनाको ज्यान गइसकेको छ । सबैभन्दा धेरै सातादोबाटो क्षेत्रमा ९ जनाको मृत्यु भएको छ ।

सडक विस्तार भएर फराकिलो हुँदा समेत दुर्घटना रोकिएका छैनन् । सडकको सानेपा नजिकैको धोबीघाट क्षेत्रमा ७ जना, ग्वार्को क्षेत्रमा ४ जना, बालकुमारी क्षेत्रमा २ जना, एकान्तकुना चोकमा १ जना, स्टार अस्पताल अगाडि २ जना, नख्खुदोबाटोमा १ जना र नयाँबाटोमा १ जना गरी २७ जनाको ज्यान गएको ललितपुर प्रहरी परिसरले जनाएको छ । 

धेरैजसो मृत्यु हुनेका पैदल यात्रु छन् । जथाभावी बाटो काट्ने तथा सडक निर्माण गर्दा पैदल यात्रुको लागि आवश्यक फूटपाथ नभएकाले पनि दुर्घटना बढेको ललितपुर ट्राफिक प्रहरी प्रमुख प्रहरी निरीक्षक राजेश सिलवालले बताए ।

नेपालमा फराकिलो खालको बाटो पहिलो पटक बनेको र यस्ता खालका बाटोमा कसरी यात्रा गर्ने भन्ने ज्ञानको कमीले गर्दा धेरैजसो पैदल यात्रुको ज्यान जाने गरेको सिलवालले बताए । 

प्रहरी निरीक्षक सिलवालले भने, ‘हामीमा चेतनाको कमी पनि छ । जथाभावी बाटो काट्छौं । नजिकै ओभर ब्रिज हुँदा पनि सडकबाटै दौडिन्छौं । दुर्घटनाको मुख्य कारण पनि यही नै हो ।’ पैदल यात्रुलाई मोटरसाइकल र मिनीबसले ठक्कर दिने तथा खुला बाटोका तीब्र गतिका कारणले ज्यान जाने गरेको सिलवालले बताए ।

बाटो फराकिलो भएपनि झण्डै २ किलोमिटरको अन्तरमा मात्रै ‘जेब्रा क्रसिङ’ हुँदा सर्वसाधारण बाटोको विचबाटै हिँड्न बाध्य भएका स्थानीयको भनाइ छ । चक्रपथमा जोडिने सहायक सडकलाई ध्यानमा नराखी निर्माण भएको कोटेश्वर–कलंकी सडक खण्डले ट्राफिक जाम समेत खेप्नुपरेको नख्खु दोबाटोका स्थानीय विकास महर्जनले बताए ।

‘ल भन्नुस् बाटो काट्न झण्डै २ किलोमिटर तल नगइकन सकिँदैन । फर्किंदा २ किलोमिटर थप हिँड्नुपर्छ । सहायक सडकलाई पनि ध्यान दिएको भए यस्तो हुने थिएन । यसले गर्दा नख्खुमा जाम परेको छ, यो कसले देख्ने ?’ महर्जनले आक्रोश पोखे ।

गत माघ १४ गते नेपालका लागि चिनियाँ राजदूत यू होङले प्रधानमन्त्री केपी शर्मा ओलीलाई कोटेश्वर–कलंकी सडक हस्तान्तरण गरेका थिए । हस्तान्तरणपछि सडकमा केही प्रविधिक कमी रहेको आवाज पनि उठ्दै आएको छ ।