काठमाडौं – चीनका पूर्वप्रधानमन्त्री ली पेङको ९१ वर्षको उमेरमा मृत्यु भएको छ । सन् १९८९ मा भएको तियानानमेन स्क्वेयर विरोध प्रदर्शनमा दमन गर्नका लागि मार्सल ल लगाइएको घोषणा उनैले गरेका थिए । 

लीको सोमवार निधन भएको हो । 

ली चीनको शक्तिकेन्द्रमा दुई दशकसम्म रहेका थिए र सन् २००२ मा सेवानिवृत्त भएका थिए । उनले चीनमा विस्तारित आर्थिक वृद्धि तथा निरंकुश राजनीतिक नियन्त्रणको बिरासत छोडेर गएका छन् । 

तियानानमेन काण्डपछि उनले चीनको विश्वमा कूटनीतिक पहुँच र आर्थिक शक्ति बढाउन योगदान गरेका थिए । उनले सार्वजनिक रूपमा कडा राष्ट्रवादी बयान दिने गरेका थिए । 

लीको नेपालसँग न्यानो सम्बन्ध थियो । नेपालका पूर्व परराष्ट्रमन्त्री रमेशनाथ पाण्डेले फेसबूकमा पोस्ट गर्दै सन् १९८९ को नोभेम्बर महिनामा नेपालले भारतबाट नाकाबन्दीको सामना गरिरहेको बेलामा लीले नेपालको भ्रमण गरेको स्मरण गरेका छन् । 

त्यस्तै नेपाल र चीन जोड्ने रेलमार्ग तथा स्याफ्रुबेसी लगायतका राजमार्ग निर्माण गर्ने काम पनि उनको नेपाल भ्रमणकै बेलामा निर्णय गरिएको पाण्डेको कथन छ ।