जर्मनीमा साइनागोग आक्रमणकारी हतियारसहित आएका थिए, ढोकाले बचायो धेरैको ज्यान

असोज २३, २०७६

काठमाडौं – जर्मनीको पूर्वी भागमा रहेको हेल शहरमा एक साइनागोगमा यहुदीहरू पवित्र योम किप्पुर चाड मनाइरहेको बेलामा बुधवार एक आक्रमणकारीले आक्रमण गरेका छन् ।

हेल्मेटमा भिडियो क्यामरा राखेर लाइभ स्ट्रीमिङ गर्दै उनले साइनागोगको ढोकामा धक्का दिए, ढोकाको ताल्चामा थुप्रै गोली हाने, ढोकामा विस्फोटक पदार्थ राखेर पड्काए । 


ADVERTISEMENT

तर केही गरे पनि उनी भित्र पस्न सकेनन् । 

ढोका अडिरहेकाले साइनागोगभित्रका थुप्रै मानिसको ज्यान बच्यो । 

प्रहरीका अनुसार, बन्दूकधारीले दुईजनाको हत्या गरे । तीमध्ये एकजना साइनागोग बाहिर थिए भने अर्का चाहिँ नजिकैको कबाब पसलमा थिए । 

प्रहरीले बन्दूकधारीलाई पक्राउ गरेको छ । 

त्यस आक्रमणको ३५ मिनटको भिडियो अन्लाइनमा पोस्ट गरिएको थियो । बन्दूकधारीले कारमा विस्फोटक पदार्थ बोकेर आएको अनि साइनागोगको ढोका फोर्न खोजेको, नसकेपछि दिक्क मान्दै आमाचकारी गाली गरेको र गाडी हाँकेर अन्तै गएको देखिन्छ । 

त्यतिखेर साइनागोगमा ७० देखि ८० मानिस रहेको हेलको यहुदी समुदायका प्रमुख म्याक्स प्रिभोरोज्कीले जर्मन पत्रिका देर स्पीगेललाई बताए । 

साइनागोगभित्र आफूहरूले गोलीको आवाज सुनेको र प्रार्थना बन्द गरेको प्रिभोरोज्कीले बताए । प्रवेशद्वारमा राखिएको क्यामराबाट आफूले एक व्यक्ति भित्र आउन खोजेको, ढोकामा गोली हानेको र बम फ्याँकेको देखेको बताए । 

‘तर ढोका बन्दै रहयो, भगवानले हामीलाई रक्षा गनुएभयो,’ उनले बताए । ‘पूरै घटना पाँचदेखि १० मिनटसम्म सकियो ।’

भिडियोमा ती व्यक्तिले कालो लुगा र पञ्जा लगाएको देखिन्छ । उनले यहुदीविरोधी बकबक गरेको, यहुदी नरसंहार हुँदै नभएको र संसारका समस्याहरूमा यहुदी नै जरो रहेको बताएको सुनिन्छ ।

सीएनएनबाट

असोज २३, २०७६ मा प्रकाशित

प्रतिक्रिया दिनुहोस