पूर्व सभामुख कृष्णबहादुर महराविरुद्धको मुद्दामा काठमाडौं जिल्ला अदालतले आज (सोमवार) फैसला सुनाउँदै छ ।

न्यायाधीश अम्बरराज पौडेलको इजलासमा आइतवार सुनुवाइ सम्पन्न भएपछि आज फैसला सुनाउने तयारी भएको हो ।

आइतवार हेर्दाहेर्दैमा राखिएको मुद्दाको फैसला सुन्न महरा बिहान ११ बजे नै बबरमहलस्थित जिल्ला अदालतमा पुगेका छन् ।

मध्याह्नअघि नै फैसला आइसक्ने अपेक्षासहित महराका कानून व्यवसायी तथा पत्रकारहरू समेतले प्रतीक्षा गरिरहे पनि केही ढिलाइ भएको छ ।

आइतवार महराका पक्षबाट वरिष्ठ अधिवक्ताहरू रमनकुमार श्रेष्ठ, लव मैनाली, शेरबहादुर केसी, डा. भीमार्जुन आचार्य र सविता भण्डारी बराल तथा अधिवक्ताहरू सुशील सापकोटा, मुरारी सापकोटा र डा. दीनमणि पोखरेलले बहस गरेका थिए ।

संघीय संसद् सचिवालयमा कार्यरत महिला कर्मचारीमाथि यौन दुर्व्यवहार गरेको आरोपमा उनी गत असोज १९ गते बालुवाटारस्थित सभामुखको सरकारी निवासबाट पक्राउ परेका थिए । 

बलात्कार प्रयासजस्तो गम्भीर आरोप लागेपछि महराले असोज १४ गते सभामुख पदबाट राजीनामा दिएका थिए ।

महरा पक्राउ परेपछि काठमाडौं जिल्ला अदालतमा मुद्दा अघि बढेको थियो ।

मुद्दाको प्रारम्भिक सुनुवाइपछि न्यायाधीश सुदर्शनराज पाण्डेको एकल इजलासले महरालाई पुर्पक्षका लागि थुनामा पठाउन कात्तिक १८ गते आदेश दिएको थियो ।

महराविरुद्ध किटानी जाहेरी दिने महिलाले यसबीचमा बयान फेर्दै महरालाई रिहा गर्न अदालतमा लिखित निवेदन नै दिएकी थिइन् ।