नेकपा अध्यक्ष पुष्पकमल दाहाल ‘प्रचण्ड’ले सरकारले कुनै अध्यादेश ल्याएमा केही दिन रोक्न राष्ट्रपति विद्यादेवी भण्डारीसँग आग्रह गरेका छन् ।

राष्ट्रपति कार्यालय शीतल निवासमा दिउँसो भएको भेटमा प्रचण्डले सरकारले अध्यादेश ल्याएमा केही दिन रोक्न आग्रह गरेका हुन् । 

शीतल निवासबाट फर्केपछि बसेको नेकपा स्थायी कमिटी बैठकमा प्रचण्डले राष्ट्रपति विद्यादेवी भण्डारीसँग आफूले राजनीतिक दुर्घटना गराउने कुनै प्रस्ताव नल्याउन आग्रह गरेको जानकारी गराएका हुन् । 

‘प्रधानमन्त्रीले सल्लाह नगरी संसद् अधिवेशन अन्त्य गरेर ठीक गर्नुभएन, मैले पार्टी बैठक चलिरहेको समयमा छलफल नगरी अधिवेशन अन्त्य नगर्नुस् भनेको थिएँ,’ प्रचण्डको भनाइ उद्धृत गर्दै नेकपा स्रोतले भन्यो, ‘सरकारबाट अध्यादेश आयो भने एकदुई दिन रोक्नुहोला, अध्यादेश जारी गर्न हतार नगर्नु होला ।’

प्रचण्डले नेकपाभित्र भइरहेको बहस पार्टीमा विधि स्थापित गर्न र कम्युनिस्ट आन्दोलनको शुद्धीकरणका लागि भएको जानकारी गराएको पनि बैठकमा सुनाएका थिए । राष्ट्रपतिबाट के जवाफ आयो भन्नेबारे भने प्रचण्डले केही सुनाएनन् । 

प्रचण्डले पार्टी एकता बचाउनका लागि भोलि दिनभर नेताहरूसँग छलफल गर्ने स्थायी कमिटी बैठकमा बताएका थिए ।

बैठकपछि प्रवक्ता नारायणकाजी श्रेष्ठले भोलि दिनभर अध्यक्षद्वयबीच छलफल हुने र शनिवार ११ बजे स्थायी कमिटी बैठक बस्ने जानकारी गराए ।  

‘कमरेड प्रचण्ड राष्ट्रपतिकोमा जानुभएको कुरा चाहिँ विशेषत फेरि अहिलेको परिवेशमा संसद् अधिवेशन अन्त्य भएपछि अध्यादेश जस्ता विषय चर्चामा आए, अहिले त्यो स्थिति होइन भनेर भन्न जानुभएको हो । राष्ट्रपतिले अहिले अध्यादेश आएको छैन, प्रधानमन्त्रीले पनि अहिले आउने सम्भावना छैन भनेर भनेको जानकारी बैठकमा गराउनुभयो,’ बैठकपछि प्रवक्ता नारायणकाजी श्रेष्ठले भने ।