लुम्बिनी विकास कोषको सदस्य सचिवमा सानु राजा शाक्य नियुक्त भएका छन् ।

मन्त्रिपरिषद्ले उनलाई ४ वर्षका लागि सदस्य सचिव नियुक्त गरेको हो । 

नवनियुक्त सदस्य सचिव शाक्यले बुधवार लुम्बिनीमा पदभार ग्रहण गरेका छन् । पदभार ग्रहण गर्दै सदस्य सचिव शाक्यले लुम्बिनी गुरुयोजना समयमै सक्ने, लुम्बिनीलाई स्मार्ट लुम्बिनी बनाउन आफूले योजनाबद्ध काम गर्ने र त्यसको लागि सबैको सहयोग र सहकार्य जरुरी रहेको बताए ।

शाक्यको स्वागतमा कोषले राखेको स्वागत कार्यक्रममा कोषका उपाध्यक्ष भिक्षु मैत्तयले लुम्बिनी गुरुयोजना समयमै सम्पन्न गर्न र लुम्बिनीको गरिमा अझै प्रभावकारी गराउन सदस्य सचिवको नियुक्तिले विशेष भूमिका खेल्ने बताए ।

सो अवसरमा कायममुकायम सदस्य सचिव ज्ञानिन राईले विगत ३ वर्षदेखि कहिले निमित्त त कहिले कामुले लुम्बिनीको सदस्य सचिवको जिम्मेवारी सम्हाल्दा कतिपय कामहरू प्रभावकारी ढंगले अगाडि बढ्न नसकेको अवस्थामा सरकारले गरेको निर्णयले आफूहरूलाई उत्साहित बनाएको बताए ।

करीब ३ वर्षअघि तत्कालीन सदस्य सचिव अजितमान तामाङको कार्यकाल सकिएपछि लुम्बिनी विकास कोषमा विष्णुप्रसाद ढकालले केही समय सदस्य सचिवको जिम्मेवारी सम्हालेका थिए । काठमाडौं महानगरपालिका–२१ निवासी नवनियुक्त शाक्य युवा बौद्ध समूहमा रहेर काम गरेका छन् ।

उनले बौद्ध अध्ययन र समसामयिक वस्तुस्थितिमा विभिन्न लेखहरू प्रकाशन गर्दै आएका छन् । उनीसँग विगतमा लुम्बिनीमै बसेर काम गरेको अनुभव पनि छ ।