ललितपुर महानगरपालिकाले आगलागीबारे अध्ययन समिति गठन गरेको छ ।

महानगरपालिका फोहोरमैला व्यवस्थापन केन्द्रमा गत शुक्रवार अपराह्न भएको आगलागीको कारण पत्ता लगाउन समिति गठन गरिएको हो । 

महानगरपालिका विपद् व्यवस्थापन समितिका संयोजक नारायणलाल अवालेको संयोजकत्वमा अध्ययन समिति गठन भएको महानगरपालिकाका प्रमुख चिरीबाबु महर्जनले बताए । उनले भने, ‘आगलागी भएको १ हप्तामा अध्ययन प्रतिवेदन पेश गर्न निर्देशन दिएको छु । यस समितिले आगलागी हुनुको कारण, क्षति र अब यस्तो घटना नदोरिहन अपनाउनुपर्ने सुरक्षात्मक उपायसमेत प्रतिवेदनमा उल्लेख गर्ने छ ।’

केन्द्रका प्रमुख सुरेन्द्रराज अवालेले आगलागी शुरू भएको १ घण्टामा आगो नियन्त्रण भएको भनाइ राखे । उनले भने, ‘चाडपर्व  परेका बेला अन्य समयभन्दा बढी फोहोर संकलन हुन्छ र भइपनि रहेको छ ।’

सिसडोल ल्याडफिल्ड साइटमा फोहोर पुर्‍याउनु अघि महानगरपालिकाका फोहोर निरन्तर उठिरहेको अवालेले बताए । समितिमा महानगरपालिकाका प्रवक्ता राजु महर्जन, ८ नम्बरका वडाध्यक्ष हेम महर्जन, फोहोरमैला केन्द्रका प्रमुख सुरेन्द्रराज अवाले, मेकानिकल इन्जिनीयर पुष्कर भट्टराई रहेका बताइएको छ ।