एक महिना लामो अमेरिका बसाइपछि अभिनेत्री वर्षा सिवाकोटी नेपाल फर्किएकी छिन् । 

नेपाल फर्किनासाथ उनले चलचित्र ‘परदेशी २’को छायांकन थालिसकेकी छिन् । 

वर्षा विगतमा पनि अमेरिका जाने आउने गर्थिन् । तर, यसपटक उनको अमेरिका भ्रमण विशेष रह्यो । किनभने, यसपटक उनले प्रेमी सविनजंग थापालाई सार्वजनिक गरिन् । 

अनावश्यक गसिप, विवाद र लभ अफेयरबाट सधैँ टाढा रहने नेपालकी चर्चित अभिनेत्री वर्षा नेपाल फर्किएपछि लोकान्तरले उनीसँग विशेष कुराकानी गरेको छ ।

वर्षा जी सर्वप्रथम तपाईंलाई बधाई छ ।

धेरै धेरै धन्यवाद । तर, यो बधाई के को लागि थियो  ?

लामो समयपछि अमेरिका पुगेर प्रेमी सार्वजनिक गर्नुभयो नि !

हाहा.. । अब सार्वजनिक गर्नुपर्छ भन्ने कुरामा म र उहाँ मानसिक रूपमा तयार भयौं । म र उहाँको बिहे गर्ने समय पनि पुगेको आभाष भयो । आखिर उहाँसँगै बिहे हुन्छ भने सार्वजनिक गर्न किन हिच्किचाउनु ?

तपाईंको प्रेम शुरूआत भएको कति भयो बताउन मिल्छ ?

हामी लगभग ३ वर्षदेखि बोल्थ्यौं । तर, कुरा र मन मिलेको डेढ वर्ष जति भयो । प्रेममा परेको फील भएको डेढ वर्ष भयो ।

सम्भवतः प्रेमीसँग प्रेममा परेपछि सबैभन्दा धेरै समय बिताएको समय पनि यही होला, कस्तो भो यसपटकको समग्र अमेरिका भ्रमण र प्रेमीसँगको भेटघाट ?

इट वाज ग्रेट । तपाईंले भनेजस्तै उहाँसँग खुलेर गफ गर्ने, एकअर्कालाई थप चिन्ने र प्रेम थप प्रगाढ गराउने मौका पनि मिल्यो । यो पटकको अमेरिका भ्रमण निकै राम्रो भयो भन्नुपर्छ ।

तपाईंले सोधेजस्तो अमेरिका प्रेमीलाई भेट्न मात्रै भन्दा पनि अरू केहि काममा गएकी थिएँ । साथसाथै केही आफ्ना आफन्त र साथीभाइहरूसँग पनि भेटघाट गर्ने अवसर मिल्यो । धेरै समयदेखि भेट्छु भनेका साथीभाइ, आफ्ना आफन्तसँगको यादगार भेटघाट पनि योपटकको उपलब्धि हो ।

आज लोकान्तरसँग एउटा कुरा बताइदिनु न, कलाकारहरूका प्रेम, ब्रेकअप, प्याचअपका कुराहरू निकै सामान्य लाग्छन् । तपाईंले अहिले जो प्रेमी सार्वजनिक गर्नुभएको छ, उहाँसँगै बिहे हुने कुरामा कत्तिको ढुक्क हुनुहुन्छ ?

पहिलो कुरा त हामीले एउटा बोल्ड निर्णय गरेरै यो कुरा सार्वजनिक गरेका छौं । हामी एकअर्काले यत्तिकै प्रेम सार्वजनिक गरेका होइनौं, पारिवारिक कुरामा केही कुरामा सहमति समेत भएकाले यो प्रेम बिहेसम्म पुग्नका लागि तयार छ भनेर बताउन चाहन्छु ।

अर्को कुरा म के कुरामा पनि ढुक्क छु भने उहाँ असाध्यै बुझ्ने व्यक्ति हो । माया गर्नुहुन्छ । सम्मान गर्नुहुन्छ । म पनि उत्तिकै माया र सम्मान गर्छु । धेरै कुरामा हामीले एकले अर्कालाई बुझेका छौं । सोही कारण हामीहरू प्रेमका लागि सम्बन्ध गाँसेका होइनौं, यो यात्रा धेरै परसम्मका लागि हुनेछ ।

त्यसो भए कहिले बिहे गर्नुहुन्छ ?

ठ्याक्कै यो वर्ष र यति गते भनेर निर्णय गरेका छैनौं । तर, अबको २ देखि ढाइ वर्षमा बिहे हुने सम्भावना धेरै छ ।

विषयवस्तु थोरै मोड्न चाहन्छु, कोभिड–१९ पछि नेपाली चलचित्रमा पारेको प्रभावलाई कसरी बुझ्नुभएको छ ?

सबैलाई थाहा भएको कुरा हो । मैले यो उद्योगमा लामो समयदेखि काम गरेकाले र अहिले पनि एक्टिभ भएर काम गरेको हिसाबले नजिकबाट नियालिरहेकी छु । नेपालको मात्रै होइन, संसारभरको चलचित्र उद्योग तहसनहस भएको कुरा सबैलाई थाहै छ । आशा राखौं, नेपाली चलचित्र उद्योग छिट्टै चलायमान हुनेछ र हुनुपर्छ ।

लामो समयपछि अभिनय यात्रामा फर्किनुभएको छ । अबको तपाईंको यात्रा कसरी अगाडि बढ्छ ?

काम त अभिनय नै हो । केही चलचित्रका कामहरू सकाउनुछ । अहिले चलचित्र ‘परदेशी २’ र अन्य केही चलचित्रको काममा व्यस्त छु । साथै म एउटा बिजनेस पनि शुरू गर्दैछु । जुन कुरा म छिट्टै बताउनेछु ।