गत जुन महिनामा लद्दाखमा भारतसँग भएको भिडन्तमा मारिएका चार चिनियाँ सैनिकको अपमान गरेको आरोपमा चीनले ६ जनालाई पक्राउ गरेको छ । 

मारिएका ती चार सैनिकलाई चीनको सरकारी सञ्चारमाध्यमले शहीदका रूपमा प्रशंसा गर्ने प्रचार अभियान चलाएको छ । 

चीनका विभिन्न भागबाट ती ६ जनालाई पक्राउ गरिएको र १५ दिनसम्म हिरासतमा राखिने प्रहरीको भनाइ छ । अर्का एक आरोपित विदेशमा बस्ने र चीन फर्किनेबित्तिकै उनलाई पक्राउ गरिने जानकारी दिइएको छ । 

राष्ट्रपति सी चिनफिङको शासनमा सरकारले राष्ट्रिय नायकको आलोचना गर्ने वा उनीहरूका विषयमा आधिकारिक भाष्यमा प्रश्न उठाउने आवाजहरूलाई सरकारले दमन गर्ने गरेको छ र 

सन् २०१८ मा चीनले एक कानून पारित गरेर मानिसहरूलाई नायक तथा शहीदको अपमान वा मानहानि गर्न प्रतिबन्ध लगाएको छ । शुरूमा यो देवानी मुद्दाका रूपमा ल्याइएको भए पनि यसलाई फौजदारी अपराध बनाउने गरी संशोधन गरिएको छ र अर्को महिनादेखि लागू हुनेछ । 

भारतसँग सीमामा भएको भिडन्तका विषयमा बेइजिङको संवेदनशीलतालाई यी पक्राउहरूले उजागर गरेका छन् ।