२ नम्बर प्रदेशको पर्सा जिल्लाको वीरगञ्ज शहर कोरोनाको ‘हटस्पट’ बन्दैछ । कोरोनाको दोस्रो लहर आएपछि वीरगञ्जको नारायणी अस्पतालमा कोरोना संक्रमित बिरामी दिनप्रतिदिन बढ्दै गएका छन् ।

नारायणी अस्पताल वीरगञ्जका मेडिकल सुपरिन्टेन्डेन्ट डा. संजयकुमार ठाकुरका अनुसार अहिले ४० जना जति कोरोना संक्रमित बिरामी अस्पतालमा भर्ना भएका छन् ।

चैत्र १५ गतेदेखि वैशाख १३ गतेको समयभित्र कूल ८१ जना कोरोना संक्रमित बिरामीहरू भर्ना भएका छन् । जसमधे १० जना संक्रमितको मृत्यु भएको उनले बताए ।

‘कडा निमोनिया र श्वासप्रश्वास रोकिने जस्तो प्रमुख लक्षण देखिने गरेको अवस्थामा भर्ना भएका केही संक्रमितलाई आईसीयूको भेन्टिलेटरमा उपचार गर्दैगर्दाको अवस्थामा मृत्यु भएको छ भने केहीको भेन्टिलेटरमा ल्याउनुअघि नै मृत्यु भएको छ,’ डा. ठाकुरले लोकान्तरसँग भने, ‘अहिले त झन् युवाहरूको समेत मृत्यु हुन थालेको छ, मृत्यु हुनेहरूमध्ये ३५ देखि ६५ वर्षसम्मका छन् ।’

नारायणी अस्पतालमा कूल २५० शय्याको अनुमति भए पनि ३०० शय्या सञ्चालनमा छन्, जसमध्ये कोभिड शय्या ४० मात्रै छन् । सबै कोभिड शय्यामा बिरामी भरिएका अस्पतालले जनाएको छ ।

संघ सरकारले दिएको निर्देशन अनुसार कूल क्षमताको ५० प्रतिशत कोभिडको लागि शय्या छुट्याउने रणनीति अन्तर्गत अबको २ दिनभित्र १५० शय्या तयार हुने ठाकुरले बताए । ‘अस्पतालमा जनरल वार्ड पनि सञ्चालन गर्नुपर्ने भएकाले केही जनशक्ति उता पनि लागेका छन्,’ ठाकुरले भने, ‘त्यसमध्येका केही जनशक्तिलाई ७ दिन ड्युटी र ७ दिन होमआइसोलेसनको रणनीति बनाइएको छ ।’
 
अस्पतालमा कार्यरत चिकित्सकसहित ७ जना स्वास्थ्यकर्मीलाई कोरोना संक्रमण भइसकेका कारण जनशक्ति व्यवस्थापनमा समस्या उत्पन्न भएको उनले बताए । ‘एक त पहिलेदेखि नै न्यून जनशक्ति छ, त्यसमा पनि जनरल र कोभिड गरेर छुट्टाछुट्टै ४ वटा टीम बनाउँदा पनि जनशक्तिको निकै अभाव भएको छ,’ उनले भने, ‘पूर्वाधार समस्या छैन, जनशक्ति नै प्रमुख समस्या बनेको छ ।’

अन्य जिल्लामा कोभिड अस्पताल सञ्चालनमा आइनसकेका कारण अन्य जिल्लाबाट पनि अस्पतालमा बिरामीहरू भर्ना हुने गरेका उनले बताए । १५ शय्याको आईसीयू र २५ शय्याको एचडीयूसहित अन्य शय्या कोभिडको लागि छुट्याइएको तथा अक्सिजन पनि तयारी अवस्थामा राखिएको उनले बताए ।