संविधानविद् डाक्टर भीमार्जुन आचार्यले राष्ट्रपति विद्यादेवी भण्डारी र प्रधानमन्त्री केपी शर्मा ओलीमाथि संसदको विशेष अधिवेशन बोलाएर कारवाही गर्न माग गरेका छन् ।

शपथ ग्रहणका क्रममा शुक्रवार राष्ट्रपति र प्रधानमन्त्रीले जानीजानी राज्य विरूद्धको अपराध गरेकाले कारवाही हुनुपर्ने डाक्टर आचार्यको तर्क छ ।

उनले भनेका छन्,संविधान र राष्ट्रको स्वाधीनतालाई गिज्याउनु राज्य बिरूद्धको अपराध हो। ’

त्यसैले तत्काल संसद्को विशेष अधिवेशन आव्हान गरी कारवाही अघि बढाउन उनले माग गरेका छन् ।

प्रधानमन्त्री केपी शर्मा ओलीले शपथ लिने क्रममा शुक्रवार 'प्रतिज्ञा गर्छु' भन्ने शब्द उच्चारण नगरेपछि राष्ट्रपति भण्डारीले फेरि 'प्रतिज्ञा गर्छु' भनेर दोहोर्याउँदा प्रधानमन्त्री अ‍ोलीले 'त्यो पर्दैन' भनेका थिए ।

सपथ ग्रहणका बेला ओलीले देखाएको व्यवहारबारे अहिले सर्वत्र आलोचना भइरहेको छ ।