कांग्रेसलाई प्रचण्डको आग्रह- समस्या समाधान गर्छु, राष्ट्रपतिको सम्बोधनलाई अवरोध नगरिदिनुस्

प्रधानमन्त्री पुष्पकमल दाहाल ‘प्रचण्ड’ले राष्ट्रपतिको सम्बोधनमा सहयोग गर्न नेपाली कांग्रेसलाई आग्रह गरेका छन् । मंगलबार बिहान कांग्रेस नेताहरूसँगको छलफलमा प्रधानमन्त्री प्रचण्डले सरकारको नीति तथा कार्यक्रम प्रस्तुत हुने दुवै सदनको संयुक्त बैठक अवरुद्ध नगर्न आग्रह गरेका हुन् । माओवादी केन्द्रका अध्यक्ष समेत रहेका प्रधानमन्त्री प्रचण्डलाई भेट्न कांग्रेस महामन्त्री गगन थापा र प्रमुख सचेतक रमेश लेखक बालुवाटार पुगेका थिए ।

प्रधानमन्त्री ‘प्रचण्ड’ले कांग्रेसका नेताहरूलाई सहकारी ठगी प्रकरणमा देखिएका समस्या समाधान गर्न आफू लागिपरेको बताएका छन् । प्रचण्डले सहकारी ठगी प्रकरणमा देखिएका समस्या समाधान गर्न आफू लागिपरेको बताएका हुन् । समस्या समाधान गर्न आफू लागिरहेको भन्दै राष्ट्रपतिको सम्बोधनमा अवरोध नपुर्‍याउन प्रधानमन्त्री प्रचण्डले आग्रह गरेको कांग्रेस नेता लेखकले जानकारी दिए । 

‘सहकारी ठगी प्रकरणमा भएको समस्या समाधान गर्न म पूरै कोसिस, काम गरिराखेको छु। म समस्या समाधानतर्फ नै उन्मुख छु। समाधान गर्छु भन्नुभयो,’ छलफलपछि प्रमुख सचेतक लेखकले भने, ‘आज नेपाल सरकारको नीति तथा कार्यक्रम राष्ट्रपति रामचन्द्र पौडेलबाट सार्वजनिक हुने भएकाले त्यो सम्बोधनलाई तपाईंहरूले अवरोध नगरिदिनूस् भन्नुभयो ।’

अहिले केही बेरमा बस्ने संसदीय दलको बैठकमा छलफल गरेर निष्कर्षमा पुग्ने प्रमुख सचेतक लेखकले बताए । 'उहाँले भनेको कुरालाई संसदीय दलको बैठकमा छलफल गरेर हामी निष्कर्ष र निर्णयमा पुग्छौं भनेर भनेका छौं,' लेखकले भने ।