सांसद आचार्यको अभिव्यक्तिप्रति आपत्ति जनाउँदै क्यान अध्यक्षले भने– झुटो र कपोलकल्पित

सत्तारुढ दल नेकपा (एमाले)का सांसद भीम आचार्यले संसद् बैठकमा दिएको अभिव्यक्तिप्रति नेपाल क्रिकेट संघ (क्यान)का अध्यक्ष चतुरबहादुर चन्दले आपत्ति जनाएका छन् ।

शुक्रवार साँझ विज्ञप्ति जारी गर्दै सांसद आचार्यले क्यान र नेपाली क्रिकेटबारे झुटो र कपोलकल्पित कुरा बोलेर सांसदले भ्रम फैलाउन खोजेको आरोप लगाएका हुन् ।

अध्यक्ष चन्दले आचार्यको अभिव्यक्तिमा आंशिक सत्यतासमेत नरहेको स्पष्ट पारेका छन् । 

गत बुधवार संसद् बैठकमा बोल्दै आचार्यले क्यानमाथि आर्थिक अनियमितताको आरोप लगाउँदै छानबिनको माग गरेका थिए ।

साथै उनले सन्दीप लामिछानेलाई टी–२० विश्वकपको १५ सदस्यीय खेलाडीको टोलीमा समावेश नगरेर क्यान स्वयंले नेपाललाई हराउने षड्यन्त्र गरेको आरोप लगाएका थिए ।

‘प्रतियोगितामा क्यानको नेतृत्वबाट अनेकौँ खालका गलत काम भइरहेको र अनियमितता भइरहेको गुनासो आएकाले सरकारले यथाशीघ्र रोक्नुपर्ने जरुरी भएकोले यो कुरा उठाएको छु,’ आचार्यले भनेका थिए, ‘टोलीको सर्वोत्कृष्ट खेलाडी सन्दीप लामिछानेलाई १५ सदस्यीय खेलाडीको टोलीमा समावेश नगरेका कारणले उनले भिसा पाएनन् ।’

सांसद आचार्यले बोलेको तीन दिनपछि वेस्ट इन्डिजमा रहेका क्यान अध्यक्ष चन्दले आपत्ति जनाएका हुन् ।

नेपालले दोस्रो पटक विश्वकप खेलिरहेको ऐतिहासिक क्षणमा खेलकुदसँग सम्बन्धित केही संस्था, व्यक्ति तथा मिडियाले भ्रम सिर्जना गर्ने प्रयास गरेको उनको गुनासो छ ।

नेपालले शनिवार बिहान बलियो टोली दक्षिण अफ्रिकाको सामना गर्दैछ । सो खेलमा सन्दीप खेल्ने निश्चित भएको छ । अमेरिकाको भिसा नलागेपछि नेदरल्यान्ड्ससँगको पहिलो खेल गुमाएका सन्दीपलाई क्यानले वेस्ट इन्डिज पुर्याउन भने सफल भएको छ ।

नेपाल भर्सेस दक्षिण अफ्रिकाः बलियो टेस्ट राष्ट्रसँग खेल्न नेपाली खेलाडी उत्साहित