स्वास्थ्य मन्त्रालयको नेतृत्व सम्हाल्दै शेरबहादुर तामाङले भने– महामारी नियन्त्रण नै प्राथमिकता, किनेरै भएपनि सबै नेपालीलाई खोप

नवनियुक्त स्वास्थ्य तथा जनसंख्या मन्त्री शेरबहादुर तामाङले कोरोना महामारी नियन्त्रण गर्नु नै आफ्नो प्राथमिकता हुने बताएका छन् । कोरोनाको महामारीलाई ध्यानमा राखेर प्रधानमन्त्रीले आफूलाई जिम्मेवारी दिएकोले विश्वास पूरा गरेरै छाड्ने बताए ।

राष्ट्रपति कार्यालयमा मन्त्री पदको शपथ लगत्तै शुक्रवार राति स्वास्थ्य मन्त्रालयमा पदभार सम्हाल्दै तामाङले कोरोना महामारी नियन्त्रण नै अहिलेको प्राथमिकता भएको बताएका हुन् । उनले स्वास्थ्य मन्त्रालयका हरेक काम पारदर्शी ढंगले पूरा गर्ने बताए ।

‘कोरोनाको महामारीलाई ध्यानमा राखेर प्रधानमन्त्रीज्यूले यो जिम्मेवारी दिनुभएको छ । यो विश्वास पूरा गर्नैपर्छ । स्वास्थ्य क्षेत्रमा आम नागरिकको पहुँच विस्तार गर्ने सस्तोमा र निशुल्क स्वास्थ्य सेवा उपलव्ध गराउने हाम्रो प्रयास हुनेछ’ मन्त्री तामाङले भने, ‘केही समयका लागि पहिलो दोस्रो र तेस्रो नम्बरको प्राथमिकता कोरोना नियन्त्रण हो । कोरोना नियन्त्रणको प्राथमितका साथ अगाडि बढ्छौं ।’

मन्त्री तामाङले किनेरै भएपनि आम नागरिकलाई खोप उपलव्ध गराउने बताए । ‘खोप उत्पादन गर्ने राष्ट्रमा छैनौ, खोप उत्पादन गर्ने मित्रराष्ट्रसँग सहयोग मागेर, कुरा गर्नुपर्ने ठाउमा कुरा गरेर र किन्नु परेछ भने किनेरै भएपनि आम नेपाली नागरिकलाई खोप लगाउँछौं’ तामाङले भने ।

तामाङले तीनवटै सरकारलाई समन्वय गरेर महामरी नियन्त्रण गर्ने विश्वास व्यक्त गरे । ‘यो लडाईमा विजयी प्राप्त गछौं, अपारदर्शी ढंगले कामगर्ने छैनौ’ तामाङले भने ।