नेकपा एमालेले प्रतिनिधि सभा पुन:स्थापना र देउवालाई प्रधानमन्त्री नियुक्त गर्न परमादेश दिने सर्वोच्चको फैसला संविधान र संसदीय शासन व्यवस्थाको मर्मविपरीत रहेको टिप्पणी गरेको छ ।

लोकान्तरसँग संक्षिप्त कुराकानी गर्दै एमाले प्रवक्ता प्रदीप ज्ञवालीले यो फैसलाले दलीय व्यवस्थाको जरा नै खल्बल्याउने प्रतिक्रिया दिए ।

'हामीले ७० वर्षदेखि जे कुराका लागि संघर्ष गर्‍यौं त्यसलाई ध्वस्त पार्ने गरी फैसला आएको छ,' ज्ञवालीले भने, 'दलीय प्रणालीको मूल जरा नै खल्बल्याउने यसको परिणाम हुन्छ ।'

सर्वोच्चको फैसलाले शक्ति सन्तुलनको सिद्धान्त पनि उल्लंघन गरेको टिप्पणी उनले गरे ।

'शक्ति सन्तुलनको सिद्धान्त समेत उल्लंघन भएको छ,' ज्ञवालीले भने, '​कार्यपालिका र विधायिकाको अधिकार दुवै न्यायपालिकामा लैजाने काम भएको छ ।'

फैसलाबाट आफूहरू निकै गम्भीर भएको ज्ञवालीको प्रतिक्रिया छ ।

'हामी निकै गम्भीर भएका छौं । जे–जे कुराहरू जसरी व्याख्याका साथ फैसला आएको छ, यो असाध्यै नकारात्मक प्रभाव पार्ने खालको छ,' प्रवक्ता ज्ञवालीले भने ।

ज्ञवालीले आफूहरूले सर्वोच्चको फैसला मान्ने र यो त्रुटिपूर्ण छ भनेर जनतामा स्थापित गर्ने बताए ।

'जतिसुकै अप्रिय भए पनि पालना गर्छौं । यो फैसलाबारे जनतामा जान्छौं, छलफल गर्छौं । फैसला त्रुटिपूर्ण थियो भन्ने स्थापित गर्ने गरी अगाडि बढ्छौं,' ज्ञवालीले भने ।

सर्वोच्च अदालतको संवैधानिक इजलासले सोमवार प्रतिनिधि सभा पुन:स्थापना गर्दै देउवालाई प्रधानमन्त्री नियुक्त गर्न परमादेश दिएको थियो ।