भारतको पूर्वोत्तरका दुई राज्य असम र मिजोरमबीच चलिरहेको सीमाविवाद शान्त हुने लक्षण देखिएको छैन । 

बिहीवार असमले आफ्नो सीमा नजिकको करीमगंजमा केही बंकर भेटेको र ती बंकरहरू मिजो अतिक्रमणकारीहरूले बनाएको दाबी गरेको छ । 

असमले सीमामा ठूलो संख्यामा सुरक्षाबल तैनाथ पनि गरेको छ । 

मिजोरमले बिहीवार केन्द्र सरकारलाई लामो पत्र लेखेको छ । त्यसमा अहिलेको परिस्थितिमा अशान्ति भड्किने चेतावनी दिइएको छ । विगत दुई दिनमा मिजोरमले पठाएको यो तेस्रो पत्र हो । 

असमले बिहीवार अबेर राति सुरक्षाबलहरूले भूबिरबन्द क्षेत्रमा बंकर फेला पारेको दाबी गरेको छ । मिजोरमबाट आएकाहरूले घुसपैठ गरेको बताइएको छ । 

केही वर्षअघि पनि भूबिरबन्द क्षेत्रमा मिजोरमले अतिक्रमण गरेर ठूलो इलाका कब्जा गरेको बताइएको छ । 

करीमगंजका एसपी पद्मनाभ बरुआले परिस्थिति नियन्त्रणमा रहेको बताए । सतर्क भएर स्थितिलाई निगरानी गरिरहेको जानकारी उनले दिए । 

भारतमा बेलायती उपनिवेशले निर्धारण गरेको सीमाको विवाद अहिलेसम्म पनि चलिरहेको हो । 

बुधवार मिजोरमका गृहसचिव अजय कुमार भल्लाले पत्र लेखेर बराक उपत्यकामा असमले लगाएको आर्थिक नाकाबन्दी अन्त्य गर्न भनेको छ । त्यसको जवाफ दिँदै बिहीवार असमले कुनै किसिमको नाकाबन्दी नगरेको बताएको छ । 

कछारकी एसपी रमनदीप कौरले ट्रकचालक तथा खाद्यान्न व्यापारीहरूले सोमवार झडप गरेपछि मिजोरमको आपूर्ति स्वेच्छाले बन्द गरिएको जानकारी दिइन् ।