प्रदेश सभाको पछिल्लो अधिवेशनको पहिलो बैठकमा मुख्यमन्त्री शेरधन राईले प्रदेशको नामकरण गर्न ढिलाइ भएकाले चाँडै गर्ने उद्घोष गरेका थिए ।

मुख्यमन्त्री राईले आफैं चासो देखाएको भनी सांसदहरू अचम्म मानिरहेका थिए तर प्रदेश सभामा एकपटक पनि नामकरणको विषय नै नउठी आठौं तथा बजेट अधिवेशन अन्त्य भएको छ ।

प्रदेश सरकारले सभामुखको सल्लाह विना नै संसद अधिवेशनको अन्त्य गर्ने निर्णय गरेको थियो । सोमवार बसेको मन्त्रिपरिषद् बैठकले सिफारिस गरेपछि प्रदेश प्रमुखले संसद सचिवालयलाई समेत सोमवारै पत्र पठाएका थिए तर सभामुख प्रदिप कुमार भण्डारीले मंगलवार १ बजेका लागि बैठक बोलाएका थिए । आफूलाई सरकारले गरेको सिफारिसबारे कुनै जानकारी नभएकाले बैठक बोलाएको भण्डारीले बताए ।

संसद सचिवालयले समेत सोमवार राति १२ बजेदेखि चालू अधिवेशन अन्त्य हुने सूचना जानकारी गराइसकेको छ । अधिवेशन अन्त्य भएपछि माओवादी केन्द्र संसदीय दलका नेता तथा पूर्व मन्त्री ईन्द्र आङवाले सामाजिक सञ्जाल फेसबूकमा लेखेका छन्, ‘अरु अपेक्षा त के नै हुनु तर आफ्नै छायाँसँग तर्सिंदै आफ्नो आयु सकिने भो प्रदेश सरकारको ।’

हुँकारका साथ चालू बजेट अधिवेशनबाटै प्रदेशको नामकरण गर्ने मुख्यमन्त्रीलाई अचानक अधिवेशन अन्त्य गर्नुपर्ने बाध्यता के परेछ भन्दै उनले प्रश्न समेत गरेका छन् । सरकारले नामकरणको विषयमा चुइँक्क नबोली अधिवेशन अन्त्य गर्नु लज्जास्पद भएको नेपाली कांग्रेसका प्रमुख सचेतक केदार कार्कीले बताए ।

प्रदेश सरकारका प्रवक्ता समेत रहेका आन्तरिक मामिला तथा कानूनमन्त्री हिम्मतबहादुर कार्कीले प्रदेशको नामकरणको विषयमा सहमति नभएका कारण अधिवेशनको अन्त्य गरिएको बताए । एमाले र कांग्रेसको आन्तरिक समस्याका कारण सांसदहरू बैठकमा सक्रिय नभएका कारण अधिवेशन अन्त्य गर्ने निर्णय गरिएको कार्कीले बताए ।

प्रदेशसभा गठन भएको ४ वर्ष हुनैलाग्दा एकपटक मात्रै मुख्यमन्त्री राईले प्रदेश सभामा प्रतिनिधित्व गर्ने दलका नेतासँग छलफल गरेका छन् । एमालेभित्र नै सहमति हुन नसकेको सत्तारुढ दलका नेताहरू बताउँछन् । 

एमालेमा माधवकुमार नेपाल पक्षका सांसदको आशमा मुख्यमन्त्री रहेका छन् भने माधव पक्षका सांसदहरू केन्द्रको निर्देशन पर्खेर बसेका छन् ।