संखुवासभाको मादी नगरपालिका– १ उम्लिङमा तेजबहादुर कार्कीसहित उनको परिवारका ६ सदस्यको हत्या गरेको आरोपमा स्थानीय लोकबहादुर कार्कीलाई पक्राउ गरी प्रहरीले आइतवार सार्वजनिक गरेको छ ।

पक्राउ परेका लोकबहादुर नातामा मृतक तेजबहादुरका भतिजा पर्छन् ।

एक अनुसन्धान अधिकृतका अनुसार लोकबहादुरको घरनजिकै रगत देखिनु पहिलो यस्तो क्लु थियो, जसले प्रहरीलाई हत्यारा पत्ता लगाउने बाटोतर्फ डोहोर्‍याएको थियो ।

‘लोकबहादुरको घर सबैभन्दा नजिक १५/२० मिटरको दूरीमा छ, त्यो भन्दा नजिक अरू कुनै घर छैनन्,’ ती अधिकृतले लोकान्तरसँग भने । 

दोस्रो ‘क्लु’ उनी लास देख्ने पहिलो व्यक्ति हुन् । उनले आफन्तलाई ‘बडा बा’ (मृतक तेजबहादुरलाई लोकबहादुरले बडा बा भन्थे) को लास फलानो ठाउँमा छ भनेका थिए । तर उनले भनेको ठाउँमा लास थिएन ।

उनले लास कुन ठाउँमा छ भनेर यकिन नभई आफन्तलाई लास फलानो ठाउँमा छ भनेर कसरी भने त ? भन्ने प्रश्नको उत्तर खोज्दा प्रमाण भेटिएको ती अधिकृतले बताए ।

तेस्रो, हत्याको प्रकृति नै प्रहरीका लागि ‘क्लु’ बन्यो । 

हत्याको प्रकृति हेर्दा यसरी हत्या कि त मानसिक रोगीले गर्छ, कि त आफन्तले गर्छ भन्ने प्रहरीलाई शुरूमै लागेको थियो ।

‘मेरो अनुभवका आधारमा यस्तो हत्या चिनजानको मान्छेले गर्न सक्छ,’ अनुसन्धानमा खटिएका एक अधिकृतले भने, ‘आफ्नो पोल खुल्ने भएपछि देख्ने जतिलाई मार्दै गएको हुनसक्छ, भन्ने पाटोमा अनुसन्धान अगाडि बढाएका थियौं ।’

लोकबहादुर मानसिक रोगी पनि रहेको र उनले त्यसको औषधि समेत सेवन गर्दै आएको अनुसन्धानमा खुलेको छ ।

उनले तेजबहादुरलाई पटक–पटक अक्रोशयुक्त व्यवहार गर्ने गरेको समेत अनुसन्धानमा देखिएको प्रहरीले जनाएको छ । 

अभियुक्तले चिर्पट (दाउरा)ले टाउको हानेर हत्या गरेको बयान दिएको प्रदेश नम्बर १ का प्रदेश प्रहरी प्रमुख डीआईजी अरुण बिसीले पत्रकार सम्मेलनमा बताए ।

घटना एकाबिहानै घटेको प्रहरी अनुसन्धानमा देखिएको छ । 

खेताला खोज्न भनेर निस्किएका तेजबहादुरलाई देख्नेबित्तिकै आक्रमण गरी हत्या गरेको र उक्त घटना देख्ने सबैलाई पालैपालो आक्रमण गर्दै गएको खुलेको छ ।

प्रहरीले व्यक्तिगत रिसइबी, आवेग, सुनियोजित हत्या अथवा लुटपाटसहित विभिन्न कोणबाट अनुसन्धान गरेको डीआईजी बीसीले बताए ।

घरमा रहेको ५ लाख र केही गरगहना सुरक्षित रहेकाले लुटपाटको उद्देश्य होइन भन्नेमा प्रहरी शुरूमै पुगेको थियो ।

बीपी कोइराला स्वास्थ्य प्रतिष्ठान सुनसरीमा गरिएको पोस्टमार्टममा भुत्ते हतियारले हान्दा टाउको रगत जमेर मृत्यु भएको देखिएको थियो ।

सीआईबीका डीएसपी रुगम कुँवरको नेतृत्वमा ३ जना सदस्य, जिल्ला प्रहरी कार्यालय संखुवासभाका प्रमुख डीएसपी लालध्वज सुवेदी, प्रदेश नम्बर १ का प्रदेश प्रहरी प्रमुख डीआईजी अरुण बिसीसहित ४० जना प्रहरीको टोली घटनास्थलमा रहेर अनुसन्धानमा विभिन्न भूमिका निर्वाह गरेका थिए ।

वृद्धा पार्वता कार्की, छोरा तेजबहादुर कार्की, बुहारी मनमाया भन्ने कमला कार्की, नातिनीबुहारी रञ्जना कार्की, नाति विपिन कार्की र नातिनी गोमा कार्कीको सोमवार हत्या भएको थियो ।

हजुर आमाको शव घरभित्र, छोराबुहारीको शव खोला छेउमा र नातिनातिनाको शव घरमाथि खर बारीमा भेटिएको थियो ।

उक्त परिवारका वयोवृद्ध हजुरबुवा तथा नातिहरू २२ वर्षीय नरेश कार्की र २५ वर्षीय रमेश कार्की जीवित छन् । वैदेशिक रोजगारीमा रहेका नरेश र रमेश नेपाल फर्किएर काजकिरियामा बसेका छन् ।