विश्वव्यापीरुपमा फैलिएको कोरोना महामारीका कारण आधुनिक सवारी साधनहरूमा प्रयोग हुने कम्प्यूटर चिप्सको सप्लाई चेनमा नराम्रो धक्का पुगेको छ ।

जसको कारण अटोमोवाइल कम्पनीहरुले कम्प्यूटर चिप्स तथा सेमीकन्डक्टर नपाउँदा उत्पादनमा कटौती गर्न बाध्य भएका छन् ।

गत शुक्रबार मात्रै जापनीज अटो जायन्ट टोयोटाले आगामी सेप्टेम्बर महिनाको उत्पादनमा ४० प्रतिशतले कटौती गर्ने निर्णय गरेको छ ।

हालै मात्र अमेरिकी अटोमोवाइल कम्पनी फोर्डले आफ्नो अमेरिकी दुईवटा उत्पादन प्लान्टको दोहोरो सिफ्ट बन्द गर्ने निर्णय गरेको छ ।

निसानले अमेरिकी र मेक्सीको प्लान्टमा हुने उत्पादनलाई घटाएको छ ।

यस्तै फक्सवागेनले आफ्ना १० हजार कामदारलाई घर पठाउन बाध्य भएको जनाएको छ ।

चिप्सको सप्लाईमा आएको मन्दिका कारण भारतीय अटोमोवाइल कम्पनीहरु समस्यामा परेका छन् ।  

नेपाली बजारको झण्डै ९७ प्रतिशत सवारी साधन भारतीय उत्पादनमा निर्भर रहेको छ । महिन्द्राका उत्पादनहरु विगत १ वर्षदेखि माग अनुसारको सप्लाई भइरहेको छैन ।

हुन्डाई, सुजुकी, टाटा मोटर्सका भारतीय प्लान्टबाट उत्पादन हुने कतिपय कार मोडल खरिद गर्न कुर्नुपर्ने वाध्यता सृजना भएको अटोमोवाइल व्यवसायीहरूले जनाएका छन् ।        

अहिले आधुनिक सवारी साधन बन्नका लागि पार्टसहरु इन्जिन, गियरबक्स, च्यासीस, ह्वील, टायर, ग्लास, प्लास्टीक, स्टीलका साथसाथै विभिन्न प्रकारका इलेक्ट्रोनीक कन्डक्टर तथा माइक्रो चिप्सहरु जस्ता पार्टस् पनि आवस्यक पर्न थालेको छ ।

आधुनिक कारहरुमा इन्जिनमा कति फ्यूल पठाउनेदेखि विण्ड स्कृनको वाइपर वा हेडलाइट कति बेला चलाउने, एयरव्याग कस्तो अवस्थामा खुल्नेदेखि क्लाइमेट कन्ट्रोल जस्ता फङ्सनहरु कम्प्युटर चिप्सको मद्दतले संचालन हुने गरेको छ ।

प्रविधिको बढ्दो प्रयोगसँगै एउटा कारमा झण्डै १ सयवटा जति माइक्रो चिप्सहरुको प्रयोग हुन थालेको छ ।

अझ कारमा व्यापकरुपमा कनेक्टेड फिचर र अटोनोमस प्रविधिको विकास भएसँगै चिप्सको मागमा अत्याधिक वृद्धि हुँदै गएको छ ।

यस्तो अवस्थामा चिप्सको अभाव हुँदा अटो मोबाइल उद्योगमा नराम्रो धक्का पुगेको अटोमोबाइल व्यवसायीहरूले बताउन थालेका छन् । एजेन्सीअरूको सहयोगमा