फेसबुकको स्वामित्व भएको इन्स्टाग्रामले बालबालिकाका लागि बनाउँदै गरेको एप ‘इन्स्टाग्राम किड्स’ हाललाई रोकेको छ । 

इन्स्टाग्रामले १३ वर्षमुनिका बालबालिकाका लागि यो एप बनाउन लागेको थियो, जसको अमेरिकामा विरोध प्रदर्शन भयो । 

अभिभावकहरूले इन्स्टाग्रामको स्वामित्व लिएको फेसबुकविरुद्ध प्रदर्शन गरेका थिए । साथै उनीहरूले यो एप नल्याउन चेतावनी पनि दिएका थिए । 

एक रिपोर्टका अनुसार इन्स्टाग्राम कम उमेरका बालबालिकाको मानसिक स्वास्थ्यमा असर गरिरहेको छ । यसको कारण इन्स्टाग्रामको कन्टेन्टलाई मानिएको छ । यस्तोमा इन्स्टाग्रामले बालबालिकाका लागि छुट्टै एप बनाउने फैसला गरेको थियो । 

इन्स्टाग्रामले इन्स्टाग्राम किड्समा अकाउन्ट बनाउनका लागि अभिभावकको मञ्जुरी अनिवार्य गरेको थियो । यो एपमा विज्ञापन नदेखाइने र बालबालिकाका लागि उमेरअनुसारको सामग्री दिइने इन्स्टाग्रामले जनाएको थियो । तर, अमेरिकी सांसद र सामाजिक समूहले सुरक्षा संवेदशीलतालाई कारण देखाउँदै यो एप ल्याउन रोक लगाउन माग गरेका थिए । 

इन्स्टाग्रामले भनेको छ, ‘हामीले सकारात्मक विचारका साथ इन्स्टाग्राम किड्सको विकास गरिरहेका थियौं । तर, हाललाई रोकिएको छ र अभिभावकले निगरानी गर्ने टुल विकास गर्नेछौं । यद्यपि वास्तविकता के हो भने बालबालिका पहिलेदेखि नै इन्टरनेटमा आइसकेका छन् ।’