संसद्‍मा २३ दिनदेखि जारी अवरोध हटाउने प्रयास स्वरूप प्रधानमन्त्री शेरबहादुर देउवाले सर्वदलीय बैठक आह्वान गरेका छन् ।

प्रतिनिधि सभामा प्रतिनिधित्व गर्ने सबै दललाई सर्वदलीय बैठकमा बोलाइएको छ । 

प्रधानमन्त्री निवास बालुवाटारमा बिहीवार बिहान बसेको बैठकमा प्रमुख प्रतिपक्षी दल नेकपा एमाले भने सहभागी छैन ।

सर्वदलीय बैठकअघि प्रधानमन्त्रीले कानून मन्त्री ज्ञानेन्द्रबहादुर कार्कीलाई एमाले अध्यक्ष केपी शर्मा ओलीसँग भेट्न पठाएका थिए । 

माधव नेपाल लगायत १४ सांसदलाई पदमुक्त गर्न पार्टीले गरेको सिफारिश कार्यान्वयन नगरेको भन्दै एमालेले संसद्‍मा अवरोध जारी राखेको छ ।

एमालेको अवरोधका बावजुद सरकारले संसद्‍बाट बजेट प्रतिस्थापन विधेयक पारित गरिसकेको छ । 

यसअघि संसद् गतिरोध फुकाउन सभामुख अग्नि सापकोटाले सर्वदलीय बैठक राखे पनि एमाले अनुपस्थित रहेको थियो ।

१४ सांसदमाथि पार्टीले गरेको कारवाही सदर नगरेर सभामुख आफ्नो दल विभाजनमा भूमिका खेलेको आरोप लगाउँदै आएको छ । 

आफूहरूका माग सम्बोधन नहुँदासम्म सरकारले बोलाएको सर्वदलीय बैठकमा सहभागी नहुने एमालेका एक प्रभावशाली नेताले लोकान्तरसँग बताए ।

माधव नेपाल नेतृत्वको पार्टीविरुद्ध आफूहरू अदालतमा समेत गएकाले उसको सहभागिता रहेको बैठकमा आफूहरू सहभागी नहुने उनको भनाइ छ ।

बजेट पारित गरेपछि प्रतिनिधि सभा बैठक आजसम्मका लागि स्थगित गरिएको छ ।

आजको बैठक सूचारु गराउन प्रधानमन्त्रीले पहल गरेका हुन् ।