भियतनामका कम्युनिस्ट नेताले लन्डनमा महंगो मासु खाएपछि आलोचना (भिडियो)

भियतनामका सार्वजनिक सुरक्षामन्त्री टो लामले लन्डनको सल्ट बे रेस्टुराँमा महंगो मासु खाएपछि देशमा उनको कठोर आलोचना भएको छ । 

उनलाई एक व्यक्तिले सुनले ढाकेको मासु खुवाएको भिडियो सार्वजनिक भएको थियो । 

उक्त मासुको मूल्य २ लाख ३२ हजार रुपैयाँ हो । 

टर्कीका शेफ नुसरत गोकेले भियतनामी मन्त्रीलाई नाटकीय पारामा मासु खुवाएका थिए । 

उनले मासुको टुक्रा काटेर त्यसमा नून दलेर चक्कुबाटै भियतनामी मन्त्रीलाई खुवाएका थिए । 

उक्त भिडियो रेस्टुरेन्टको टिकटक पेजमा राखिएको थियो । त्यसलाई तत्कालै डिलिट गरेको भए पनि भियतनाममा त्यो भाइरल भइसकेको थियो । 

भियतनामी जनताले महिनाको औसत १८ हजार रुपैयाँ मात्र कमाउने गरेका छन् । 

सामाजिक सञ्जाल प्रयोगकर्ताहरूले मन्त्रीलाई यति महंगो भोजन गरेको भनी कठोर आलोचना गरे ।